ຂປລ. ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຮຽກຮ້ອງ ໃຫ້ບັນດາພາກລັດ, ເອກະຊົນ ແລະ ປວງຊົນລາວທຸກທົ່ວໜ້າ ຈົ່ງພ້ອມກັນ ໃຫ້ການຮ່ວມມືໃນທຸກດ້ານ ເພື່ອເປັນເຈົ້າພາບທີ່ດີຮ່ວມກັນ ປະກອບ ສ່ວນເຮັດໃຫ້ ກອງປະຊຸມ ສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດອື່ນໆ ທີ່ກ່ຽວຂ້ອງ ໃຫ້ປະສົບຜົນສຳເລັດ ຕາມຈຸດປະສົງ ແລະ ເປົ້າໝາຍທີ່ວາງໄວ້.
ໃນວັນທີ 19 ສິງຫາ ນີ້, ທີ່ຫ້ອງວ່າການລັດຖະບານ ໄດ້ຈັດກອງປະຊຸມ ລາຍງານຄວາມຄືບໜ້າ ການກະກຽມ ໃຫ້ແກ່ກອງປະຊຸມ ສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດອື່ນໆ ທີ່ກ່ຽວຂ້ອງ ໂດຍການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາ 13 ຫົວໜ້າອະນຸກຳມະທິການ ທີ່ຮັບຜິດຊອບວຽກງານສະເພາະ ເພື່ອກະກຽມດຳເນີນ ການເປັນເຈົ້າພາບ ແລະ ປະທານອາຊຽນ ໃນປີ 2016, ພ້ອມດ້ວຍ ບັນດາຫົວໜ້າກົມ ແລະ ບັນດາພະນັກງານ ຈາກບັນດາກະຊວງ ທີ່ກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ, ໄດ້ຈັດຂຶ້ນເພື່ອກວດກາຄືນ ຄວາມຄືບໜ້າຄັ້ງສຸດທ້າຍ ໃນການກະກຽມ ບັນດາໜ້າວຽກຕ່າງໆ ຂອງແຕ່ລະອະນຸກຳມະການ ພ້ອມທັງປຶກສາຫາລື ບັນຫາທີ່ຍັງຄ້າງຄາ, ຂໍ້ສະເໜີ ແລະ ຂໍ້ຫຍຸ້ງຍາກຕ່າງໆ ເພື່ອຮ່ວມມືກັນແກ້ໄຂ ແລະ ຮັບປະກັນຜົນສຳເລັດ ຂອງກອງປະຊຸມ ສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດອື່ນໆ ທີ່ກ່ຽວຂ້ອງ.