ກອງປະຊຸມພົບປະ-ແລກປ່ຽນລະຫວ່າງຄະນະຜູ້ແທນສະມາຄົມນັກຂ່າວລາວ ແລະ ສື່ມວນຊົນແຂວງຈີຫຼິນ ສປ ຈີນໄດ້ຈັດຂຶ້ນຢູ່ເມືອງສາງຊຸ່ນ ເທດສະບານແຂວງດັ່ງກ່າວໃນວັນທີ 21 ສິງຫານີ້ ພາຍໃຕ້ການເປັນປະທານຂອງທ່ານຈ່າງສຸປິ່ນ ຫົວໜ້າຫ້ອງການຖະແຫຼງຂ່າວອຳນາດການປົກຄອງແຂວງຈີຫຼິນ, ທ່ານຕົງເຫວີຍເຫຣີນ ຮອງຫົວໜ້າຄະນະໂຄສະນາອົບຮົບແຂວງຈີຫຼິນ, ທ່ານບຸນເຈົ້າ ພິຈິດ ຮອງປະທານສະມາຄົມນັກຂ່າວ ທັງເປັນຜູ້ອຳນວຍການໃຫຍ່ສະຖານີໂທລະພາບແຫ່ງຊາດ ແລະຄະນະສື່ມວນຊົນລາວໄດ້ເຂົ້າຮ່ວມ.
ໃນກອງປະຊຸມ, ສອງຝ່າຍໄດ້ແລກປ່ຽນຢ່າງກວ້າງຂວາງແລະປຶກສາຫາລືກັນຢ່າງເລິກເຊິ່ງກ່ຽວກັບສະພາບຂອງແຕ່ລະຝ່າຍ ເປັນຕົ້ນວຽກງານການສຳພາດແລະຂຽນຂ່າວ ພ້ອມດ້ວຍທິດທາງແລກປ່ຽນແລະຮ່ວມມືລະຫວ່າງສອງຝ່າຍ ເຊິ່ງໄດ້ສ້າງຄວາມເຂົ້າໃຈກັນຫຼາຍຂຶ້ນ. ຂະນະດຽວກັນກໍຢືນຢັນວ່າຈະຮ່ວມກັນລາຍງານຂ່າວກ່ຽວກັບເຫດການທີ່ປະທັບໃຈໃນການແລກປ່ຽນແລະຮ່ວມມືດ້ານຕ່າງໆລະຫວ່າງສອງປະເທດໃຫ້ດີ ເພື່ອເສີມສ້າງມິດຕະພາບແລະຄວາມເຂົ້າໃຈກັນລະຫວ່າງປະຊາຊົນສອງຊາດ.
ທ່ານບຸນເຈົ້າ ພິຈິດ ກ່າວວ່າ: ການຢ້ຽມຢາມຈີນເທື່ອນີ້ລ້ວນແຕ່ແມ່ນສື່ມວນຊົນທີ່ສຳຄັນຂອງລາວ ໃນຂະນະທີ່ການແລກປ່ຽນວຽກງານການຂ່າວ ແລະ ຮຽນຮູ້ບົດຮຽນຂອງຈີນນັ້ນ, ພວກຂ້າພະເຈົ້າກໍຈະນຳສະເໜີເຫດການທີ່ໄດ້ເຫັນ, ໄດ້ຍິນຢູ່ແຂວງຈີຫຼິນນີ້ໃຫ້ປະຊາຊົນລາວໄດ້ຊາບ ແລະຫວັງວ່າຈະສາມາດເພີ່ມທະວີຄວາມເຂົ້າໃຈກັນແລະການຮ່ວມມືລະຫວ່າງປະຊາຊົນສອງຊາດລາວ-ຈີນດີຂຶ້ນຕໍ່ເນື່ອງ.
