ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 24 ສິງຫານີ້ວ່າ ປັດຈຸບັນ, ຈີນໄດ້ເລີ່ມເຂົ້າສູ່ "ເວລາກອງປະຊຸມສຸດຍອດ 20 ປະເທດ" ແລ້ວ ໂດຍຫວັງຈະໄດ້ຕ້ອນຮັບເພື່ອນມິດຈາກປະເທດຕ່າງໆ.
ທ່ານລູ້ຄ່າງ ກ່າວວ່າ: ປັດຈຸບັນ, ການກະກຽມຕ່າງໆສຳລັບກອງປະຊຸມສຸດຍອດຄັ້ງນີ້ ລວມທັງອຸປະກອນຮັບໃຊ້ຢູ່ບ່ອນພັກເຊົາແລະຫ້ອງປະຊຸມ, ການຈັດວາງກິດຈະກຳຕ່າງໆ, ການຮັບປະກັນວຽກງານກອງປະຊຸມຂອງແຂກຜູ້ຮ່ວມປະຊຸມ ແລະອື່ນໆ ລ້ວນແຕ່ມີຄວາມຄືບໜ້າດີ. ຂະນະທີ່ພາຍໃຕ້ຄວາມພະຍາຍາມຮ່ວມຂອງບັນດາຝ່າຍ, ກອງປະຊຸມສຸດຍອດ G20 ອາດຈະບັນລຸຂໍ້ຕົກລົງ 30 ລາຍການ ແລະຈະເປັນໜຶ່ງໃນກອງປະຊຸມສຸດຍອດ G20 ທີ່ໄດ້ຮັບໝາກຜົນຫຼາຍທີ່ສຸດ. ແນວໃດກໍດີ, ບັນດາປະເທດທີ່ກ່ຽວຂ້ອງລ້ວນແຕ່ຫວັງໃຫ້ເພີ່ມທະວີການຮ່ວມມື, ຮ່ວມກັນຮັບປະກັນໃຫ້ກອງປະຊຸມສຸດຍອດຫັງໂຈ່ວສຳເລັດຜົນ ເພື່ອທຸ່ມເທພະລັງແຮງໃໝ່ທີ່ແຂງແຮງເຂົ້າໃສ່ການເຕີບໂຕຂອງເສດຖະກິດໂລກ.
ຂ່າວແຈ້ງວ່າ, ນອກຈາກບັນດາຜູ້ນຳຂອງກຸ່ມ 20 ປະເທດຈະເຂົ້າຮ່ວມກອງປະຊຸມແລ້ວ ຈີນຍັງໄດ້ເຊີນຜູ້ນຳຂອງປະເທດພວມພັດທະນາຫຼາຍປະເທດ ເຊັ່ນ ລາວ, ຈາດ, ເອຢິບ, ກາຊັກສະຖານ, ເຊເນການ, ໄທ ແລະອື່ນໆ ເຂົ້າຮ່ວມກອງປະຊຸມດັ່ງກ່າວ ເຊິ່ງຄວາມເຫັນຂອງປະເທດພວມພັດທະນາກໍຈະໄດ້ສະແດງອອກຢ່າງເຕັມສ່ວນໃນກອງປະຊຸມສຸດຍອດ G20 ຫັງໂຈ່ວ.
