ວັນທີ 26 ສິງຫານີ້, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນກອງປະຊຸມຂ່າວທີ່ປັກກິ່ງວ່າ, ການຕໍ່ຕ້ານລັດທິປົກປ້ອງການຄ້າແລະການລົງທຶນ, ຊຸກຍູ້ການເຕີບໂຕຂອງການຄ້າແລະການລົງທຶນ ແມ່ນນະໂຍບາຍທີ່ໄດ້ບັນລຸຄວາມເຫັນເປັນເອກະພາບກັນແລະຖືກກ່າວຢໍ້າຫຼາຍເທື່ອໃນກອງປະຊຸມສຸດຍອດ G20 ຫຼາຍຄັ້ງ.

ອີງຕາມບົດລາຍງານທີ່ກ່ຽວຂ້ອງຂອງອົງການການຄ້າໂລກແລະອົງການເສດຖະ ກິດສາກົນອື່ນໆ, ແຕ່ເດືອນຕຸລາປີ 2015 ຫາເດືອນພຶດສະພາປີ 2016, ກຸ່ມປະເທດ G20 ໄດ້ວາງນະໂຍບາຍຈຳກັດການຄ້າເຖິງ 145 ມາດຕາ. ມີຄຳວິຈານເຫັນວ່າ, ພາຍໃຕ້ສະພາບການທີ່ລັດທິປົກປ້ອງການຄ້າຟື້ນຟູຄືນໃໝ່, ຫວັງວ່າຈະໄດ້ຮັບໝາກຜົນກ່ຽວກັບຫົວຂໍ້ນີ້ໃນກອງປະຊຸມສຸດຍອດຫາງໂຈ່ G20 ຄັ້ງນີ້. ຕໍ່ເລື່ອງນີ້, ທ່ານລູ້ຄ່າງກ່າວວ່າ: "ກອງປະຊຸມສຸດຍອດຫາງໂຈ G20 ຈະສືບຕໍ່ສຸມໃສ່ຫົວຂໍ້ ການຄ້າແລະການລົງທຶນສາກົນທີ່ແຂງແຮງ, ຍຶດໝັ້ນຕໍ່ຕ້ານລັດທິປົກປ້ອງການຄ້າແລະການລົງທຶນ, ຜ່ານການນໍາໃຊ້ກົນໄກຫຼາຍຝ່າຍ WTO ແລະກົນໄກແລກປ່ຽນເສດຖະກິດສອງຝ່າຍຢ່າງມີປະສິດທິຜົນ, ເພີ່ມຄວາມເຂົ້າໃຈກັນແລະບັນລຸຄວາມເຫັນເປັນເອກະພາບກັນ. ກອງປະຊຸມສຸດຍອດຫາງໂຈ່ G20ມີຄວາມປາຖະໜາ, ກໍມີການກະທຳຕົວຈິງ, ຈະຊຸກຍູ້ໃຫ້ວາງແຜນການເຄື່ອນໄຫວຫາງໂຈ່, ໃຊ້ການກະທຳຕົວຈິງເພື່ອຊຸກຍູ້ໃຫ້ເສດຖະກິດໂລກເຕີບໂຕຢ່າງແຂງແຮງ, ຍືນຍົງ, ດຸ່ນດ່ຽງແລະເຊື່ອມໂຍງເຂົ້າກັນ.