ຕອນບ່າຍວັນທີ 29 ສິງຫານີ້, ບໍລິສັດຮວາເຫວີຍຈີນປະຈຳລາວໄດ້ມອບຄອມພິວເຕີໂນ໊ດບຸກ Huawei matebook 50 ໜ່ວຍໃຫ້ຫ້ອງວ່າການລັດຖະບານລາວເພື່ອນຳໃຊ້ໃນວຽກງານຂອງກອງປະຊຸມສຸດຍອດອາຊຽນທີ່ຈະໄຂຂຶ້ນຢູ່ລາວໃນໄວໆນີ້. ເນື່ອງຈາກຄອມພິວເຕີໂນ໊ດບຸກດັ່ງກ່າວມີຄວາມສະດວກໃນການຖືຕິດຕົວແລະມີປະສິດທິ ພາບສູງໃນການນຳໃຊ້ຕົວຈິງຈະສາມາດຊ່ວຍຍົກລະດັບແລະປະສິດທິພາບການເຮັດວຽກຂອງພະນັກງານໃນກອງປະຊຸມສຸດຍອດອາຊຽນ.
ທ່ານດຣ.ເພັດພົມພິພັກ ຫົວໜ້າຫ້ອງວ່າການສຳນັກງານນາຍົກລັດຖະມົນຕີໄດ້ຕາງໜ້າລັດຖະບານລາວກ່າວຮັບເຄື່ອງຊ່ວຍເຫຼືອດັ່ງກ່າວພ້ອມທັງສະແດງຄວາມຂອບໃຈບໍລິສັດຮວາເຫວີຍທີ່ໄດ້ສະໜັບສະໜູນແລະປະກອບສ່ວນໃຫ້ແກ່ວຽກງານຈັດກອງປະຊຸມສຸດຍອດອາຊຽນ. ລັດຖະບານລາວໃຫ້ຄວາມສຳຄັນທີ່ສຸດຕໍ່ການກະກຽມກອງປະຊຸມສຸດຍອດຄັ້ງນີ້ໂດຍບໍລິສັດຮວາເຫວີຍບໍ່ພຽງແຕ່ໄດ້ປະກອບສ່ວນຢ່າງຕັ້ງໜ້າເພື່ອວຽກງານສື່ສານໂທລະຄົມຂອງລາວເທົ່ານັ້ນແຕ່ຍັງຕັ້ງໜ້າມີສ່ວນຮ່ວມໃນກິດຈະກຳເພື່ອສາທາລະນະປະໂຫຍດແລະຄືນກຳໄລໃຫ້ແກ່ລູກຄ້າ. ລັດຖະບານລາວຊົມເຊີຍບໍລິສັດຮວາເຫວີຍທີ່ໄດ້ລົງທຶນທັງຢືນຢັນຕໍ່ການປະກອບສ່ວນຢ່າງສູງສົ່ງໃຫ້ແກ່ລາວ.ຄອມພິວເຕີໂນ໊ດບຸກທີ່ທັນສະໄໝຂອງຮວາເຫວີຍນີ້ຈະເປັນປະໂຫຍດຢ່າງຍິ່ງໃນການຊ່ວຍພະນັກງານທີ່ເຮັດວຽກກະກຽມແລະຕ້ອນຮັບແຂກທີ່ມາຮ່ວມກອງປະຊຸມສຸດຍອດອາຊຽນນັ້ນສາມາດຍົກປະສິດທິພາບໃນການເຮັດວຽກ.
ທ່ານວາງສີຮຸຍ ທີ່ປຶກສາເສດຖະກິດການຄ້າສະຖານທູດຈີນປະຈຳລາວ, ທ່ານຈ່າງຕຸ່ງຢາ ຜູ້ອຳນວຍການໃຫຍ່ບໍລິສັດຮວາເຫວີຍປະຈຳລາວແລະເຈົ້າໜ້າທີ່ກ່ຽວຂ້ອງໄດ້ເຂົ້າຮ່ວມພິທີດັ່ງກ່າວ.
