ວັນທີ 29 ສິງຫານີ້ຢູ່ຕຶກປ່າຢີ່ ນະຄອນຫຼວງປັກກິ່ງ, ທ່ານຟານສາງລົງ ຮອງປະທານຄະນະກຳມະການການທະຫານສູນກາງຈີນໄດ້ພົບປະກັບທ່ານໂງຊວນລິກ ຮອງເລຂາທິການຄະນະກຳມະການສູນກາງພັກກອມມູນິດຫວຽດນາມ, ລັດຖະມົນຕີກະຊວງປ້ອງກັນປະເທດຫວຽດນາມ.
ທ່ານຟານສາງລົງກ່າວວ່າ: ສອງປະເທດຈີນ-ຫວຽດນາມມີພູຜາແມ່ນ້ຳຕິດຈອດກັນ, ວັດທະນະທຳຄ້າຍຄືກັນແລະມີຜົນປະໂຫຍດຮ່ວມກັນ. ຈີນຍິນດີພະຍາຍາມຮ່ວມກັບຫວຽດນາມເພື່ອຈັດຕັ້ງປະຕິບັດຕາມຄວາມເປັນເອກະພາບກັນທີ່ເລຂາທິການໃຫຍ່ພັກສອງປະເທດໄດ້ຕົກລົງຮ່ວມກັນຢ່າງເດັດດ່ຽວ ແລະເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມໃຫ້ໄດ້ຮັບການພັດທະນາໃໝ່ຢ່າງບໍ່ຢຸດຢັ້ງ. ຂະນະດຽວກັນກໍຍິນດີຮ່ວມກັບຫວຽດນາມເພີ່ມທະວີການສ້າງຄວາມເຂົ້າໃຈກັນດ້ານຍຸດທະສາດຕື່ມອີກ, ລົງເລິກການຮ່ວມມືຕົວຈິງ,ປະຕິບັດຕໍ່ແລະແກ້ໄຂຄວາມຂັດແຍ້ງຢ່າງເໝາະສົມ, ຊຸກຍູ້ສາຍພົວພັນລະຫວ່າງສອງກອງທັບໃຫ້ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.
ທ່ານໂງຊວນລິກກ່າວວ່າ: ຫວຽດນາມໃຫ້ຄວາມສຳຄັນສູງຕໍ່ການເສີມຂະຫຍາຍສາຍພົວພັນລະຫວ່າງສອງປະເທດ, ປົກປັກຮັກສາລະບອບສັງຄົມນິຍົມຂອງສອງປະເທດແລະຮັດແໜ້ນມິດຕະພາບທີ່ມີມູນເຊື້ອຂອງສອງຝ່າຍ ແລະການທີ່ຮັກສາສັນຕິພາບແລະສະເຖຍລະພາບຂອງພາກພື້ນສອດຄ່ອງກັບຜົນປະໂຫຍດຮ່ວມຂອງສອງປະເທດ. ສອງກອງທັບມີມິດຕະພາບທີ່ເປັນມູນເຊື້ອອັນເລິກເຊິ່ງ, ໃນຕໍ່ໜ້າ, ຄວນສືບຕໍ່ເພີ່ມຄວາມໄວ້ເນື້ອເຊື່ອໃຈກັນ, ລົງເລິກການຮ່ວມມືຕົວຈິງໃນຂົງເຂດຕ່າງໆ, ແກ້ໄຂຄວາມຂັດແຍ້ງໃຫ້ເໝາະສົມ, ປະກອບສ່ວນຢ່າງຕັ້ງໜ້າເພື່ອຊຸກຍູ້ການພົວພັນລະຫວ່າງສອງພັກ-ລັດໃຫ້ພັດທະນາຢ່າງປອດໃສ.