ການຮ່ວມມືອາເມລິກາ-ຈີນເປັນກຳລັງແຮງທີ່ສຳຄັນໃນການຮັບມືກັບການປ່ຽນແປງຂອງດິນຟ້າອາກາດ

ວັນທີ 29 ສິງຫານີ້, ທ່ານ ໄບຣເອິນ ດີສ໌ ທີ່ປຶກສາຊັ້ນສູງຂອງທ່ານ ບາຣັກ ໂອບາມາ ປະທານາທິບໍດີອາເມລິກາກ່າວວ່າ, ອາເມລິກາແລະຈີນໄດ້ຮ່ວມກັນຫຼາຍດ້ານເພື່ອການປ່ຽນແປງຂອງດິນຟ້າອາກາດ ແລະແມ່ນກຳລັງແຮງທີ່ສຳຄັນອັນໜຶ່ງໃນການຮັບມືກັບການປ່ຽນແປງຂອງດິນຟ້າອາກາດທົ່ວໂລກ.

ທ່ານ ດິສ ໄດ້ຈັດກອງປະຊຸມຂ່າວແຈ້ງເລື່ອງ ທ່ານ ບາຣັກ ໂອບາມາ ປະທານາທິບໍດີອາເມລິກາຈະເຂົ້າຮ່ວມກອງປະຊຸມສຸດຍອດ G20 ຢູ່ເມືອງຮາງໂຈວສປຈີນໃນເດືອນກັນຍາໜ້ານີ້ ຢູ່ທຳນຽບຂາວ ໂດຍກ່າວວ່າ, ການປ່ຽນແປງຂອງດິນຟ້າອາກາດ ແມ່ນເນື້ອໃນສຳຄັນໃນການພົບປະລະຫວ່າງທ່ານໂອບາມາກັບຜູ້ນຳຈີນ ແລະຄາດວ່າ, ສອງຝ່າຍຈະປຶກສາຫາລືຄວາມເປັນໄປໄດ້ໃນ 3 ດ້ານຄື ເຮັດໃຫ້ "ສັນຍາປາຣີ" ມີຜົນບັງຄັບໃຊ້ໂດຍໄວ, ທຳລາຍ hydrofluorocarbon (HFC) ເປັນກ້າວໆ ແລະຫຼຸດການລະບາຍມົນລະພິດຂອງຂະແໜງການການບິນທົ່ວໂລກ.