ປະທານປະເທດຈີນພົບປະກັບນາຍົກການາດາ

ວັນທີ 31 ສິງຫາຜ່ານມານີ້ຢູ່ຫໍຮັບແຂກຕ້ຽວຢີຖາຍທີ່ນະຄອນຫຼວງປັກກິ່ງ, ທ່ານສີຈິ້ນຜີງ, ປະທານປະເທດຈີນໄດ້ພົບປະກັບທ່ານຈັສຕິນ ຕຣຸໂດ, ນາຍົກລັດຖະມົນຕີການາດາ.

ທ່ານສີຈິ້ນຜີງຍິນດີຕ້ອນຮັບທ່ານຕຣຸໂດມາຢ້ຽມຢາມຈີນຢ່າງເປັນທາງການແລະເຂົ້າຮ່ວມກອງປະຊຸມສຸດຍອດ G20 ເມືອງຫາງໂຈ. ທ່ານຊີ້ອອກວ່າ, ຈີນແລະການາດາມີມິດຕະພາບທີ່ມີມູນເຊື້ອອັນໜາແໜ້ນ. ພາຍຫຼັງສອງປະເທດສ້າງສາຍພົວພັນທາງການທູດມານີ້, ການພົວພັນລະຫວ່າງສອງປະເທດໄດ້ຂະຫຍາຍໄປຂ້າງໜ້າຢ່າງບໍ່ຢຸດຢັ້ງ. ຈີນຍິນດີຮ່ວມກັບການາດາຍຶດໝັ້ນຫຼັກໝັ້ນເຄົາລົບນັບຖືເຊິ່ງກັນແລະກັນແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ພະຍາຍາມສ້າງສະພາບການໃໝ່ແຫ່ງການພັດທະນາສາຍພົວພັນລະຫວ່າງສອງປະເທດ, ເພື່ອສ້າງຜົນປະໂຫຍດຫຼາຍກວ່າເກົ່າໃຫ້ແກ່ປະຊາຊົນສອງປະເທດ.

ທ່ານຕຣຸດໂດກ່າວວ່າ, ການາດາຕີລາຄາໃນລະດັບສູງຕໍ່ຜົນງານພັດທະນາຢ່າງໃຫຍ່ຫຼວງທີ່ຈີນໄດ້ຮັບໃນຫຼາຍສິບປີມານີ້, ແລະຮູ້ສຶກດີໃຈຫຼາຍຕໍ່ການາດາແລະຈີນພັດທະນາການຮ່ວມມືຢ່າງວ່ອງໄວໃນຂົງເຂດເສດຖະກິດການຄ້າ, ວັດທະນະທຳແລະອື່ນໆ. ສອງຝ່າຍສຸມກຳລັງເພື່ອລົງເລິກການຮ່ວມມືກັບຈີນໃນຂົງເຂດເສດຖະກິດການຄ້າ, ການລົງທຶນແລະການປະຕິບັດກົດໝາຍ. ການາດາເຫັນດີນຳຫົວຂໍ້ການສຸມໃສ່ການປະຕິສ້າງໃໝ່ແລະການເຕີບໂຕແບບກວມລວມຂອງກອງປະຊຸມສຸດຍອດ G20 ຫາງໂຈ, ສະໜັບສະໜູນຈີນຈັດກອງປະຊຸມສຸດຍອດ G20 ຫາງໂຈໃຫ້ໄດ້ຮັບຜົນສຳເລັດ.