ວັນທີ 2 ກັນຍານີ້, ທ່ານ ຈູ່ກ່ວງຢ້າວ ຮອງລັດຖະມົນຕີກະຊວງການເງິນຈີນ ຊີ້ແຈງໃນກອງປະຊຸມຂ່າວກ່ອນໄຂກອງປະຊຸມສຸດຍອດ G20 ຮາງໂຈ່ວວ່າ, ຈີນພວມຊຸກຍູ້ຂະບວນການຕັດຮອນຄວາມສາມາດການຜະລິດຕາມຫຼັກການຕະຫຼາດແລະພາຫະນະກົດໝາຍ.
ທ່ານ ຈູ່ກ່ວງຢ້າວຍົກໃຫ້ເຫັນວ່າ, ບັນຫາການຕັດຮອນຄວາມສາມາດການຜະລິດ, ຈີນແມ່ນປະເທດທີ່ນຳໜ້າຈັດຕັ້ງປະຕິບັດໃນກຸ່ມເສດຖະກິດຕົ້ນຕໍຂອງໂລກ, ສະເພາະເຫຼັກກ້າແລະຖ່ານຫີນ, ຈີນທັງມີເປົ້າໝາຍຊີ້ນຳທີ່ຈະແຈ້ງ ທັງມີນະໂຍບາຍສະໜັບສະໜູນທີ່ໝັ້ນແກ່ນ ໂດຍໄດ້ສ້າງກອງທຶນປັບປຸງອົງປະກອບທີ່ມີມູນຄ່າ 100 ຕື້ຢວນ ເພື່ອສ້າງວຽກງານທຳໃຫ້ກຳມະກອນທີ່ຫວ່າງງານ ເຊິ່ງເປັນການສະແດງໃຫ້ເຫັນເຖິງຄວາມຕັດສິນໃຈອັນເດັດດ່ຽວໃນການຕັດຮອນຄວາມສາມາດການຜະລິດຂອງຈີນ. ແນວໃດກໍດີ, ມາດຕະການທີ່ຈີນນຳໃຊ້ນັ້ນ ໄດ້ອີງຕາມຫຼັກການຕະຫຼາດແລະພາຫະນະກົດໝາຍ. ທົ່ວໂລກໄດ້ເຫັນການກະທຳແລະຄວາມພະຍາຍາມຂອງຈີນ ແລະຫວັງໃຫ້ທົ່ວໂລກມີຄວາມເຫັນເອກະພາບກັນໃນດ້ານນະໂຍບາຍ ເພື່ອປະກອບສ່ວນໃຫ້ແກ່ການພັດທະນາເສດຖະກິດຂອງໂລກຢ່າງແຂງແຮງ, ຕໍ່ເນື່ອງແລະກ້ຳເກິ່ງກັນ.
ທ່ານ ຈູ່ກ່ວງຢ້າວ ຍັງເນັ້ນວ່າ, ໃນການຕັດຮອນຄວາມສາມາດການຜະລິດ, ທົ່ວໂລກຄວນຮ່ວມກັນຈັດຕັ້ງປະຕິບັດມາດຕະການທີ່ບັງເກີດຜົນ.
 |
