ທ່ານສີຈິ້ນຜີງຊີ້ອອກວ່າ, ຈີນແລະລາວເປັນປະເທດບ້ານໃກ້ເຮືອນຄຽງທີ່ດີ,ເພື່ອນມິດທີ່ດີ, ສະຫາຍທີ່ີດີ,ແລະຄູ່ຮ່ວມທີ່ດີ. ນັບແຕ່ຈີນແລະລາວສ້າງຕັ້ງສາຍ ພົວພັນທາງການທູດເປັນເວລາ55ປີຜ່ານມາ, ມິດຕະພາບອັນເປັນມູນເຊື້ອລະຫວ່າງສອງປະເທດໄດ້ນັບມື້ນັບເຂົ້າສູ່ຈິດໃຈສ່ວນເລິກຂອງປະຊາຊົນ, ການຮ່ວມມືໃນຂົງເຂດຕ່າງໆໄດ້ດຳເນີນເຂົ້າສູ່ລວງເລິກຢ່າງຮອບດ້ານ, ແລະໄດ້ສ້າງຜົນປະໂຫຍດອັນແທ້ຈິງໃຫ້ປະຊາຊົນສອງຊາດ. ໃນເດືອນພຶດສະພາປີນີ້ທ່ານມາຢ້ຽມຢາມຈີນ, ພວກຂ້າພະເຈົ້າໄດ້ບັນລຸຄວາມເຫັນເປັນເອກະພາບກັນທີ່ສຳຄັນກ່ຽວກັບລົງເລິກການຮ່ວມມືຍຸດທະສາດຮອບດ້ານລະຫວ່າງຈີນ-ລາວໃນໄລຍະໃໝ່. ຈີນຍິນດີຮ່ວມກັບລາວ, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໃຫ້ພັດທະນາກ້າວໜ້າເລື້ອຍໆ, ທັງຮ່ວມມືສ້າງປະຊາຄົມຮ່ວມຊາຕາກຳຈີນລາວທີ່ໜັກແໜ້ນແບບບໍ່ມີສິ່ງໃດຈະທຳລາຍໄດ້.
ທ່ານສີຈິ້ນຜີງເນັ້ນວ່າ, ພວກຂ້າພະເຈົ້າຄວນເພີ່ມທະວີການໄປມາຫາສູ່ຢ້ຽມຢາມກັນລະຫວ່າງການນຳຂັ້ນສູງໃຫ້ໃກ້ຊິດກວ່າເກົ່າ, ລົງເລິກການແລກປ່ຽນດ້ານຍຸດທະສາດ, ເພີ່ມທະວີການແລກປ່ຽນບົດຮຽນດ້ານການກໍ່ສ້າງພັກແລະຄຸ້ມຄອງລັດ. ຕ້ອງເຊື່ອມຕໍ່ຍຸດທະສາດການພັດທະນາ,ລົງເລິກການຮ່ວມມືແບບຕ່າງຝ່າຍຕ່າງມີຜົນປະໂຫຍດ, ຮ່ວມກັນຊຸກຍູ້ການກໍ່ສ້າງ"ໜຶ່ງແລວທາງໜຶ່ງເສັ້ນທາງ"ແລະການຮ່ວມມືເພື່ອຍົກສູງຄວາມສາມາດການຜະລິດ, ເພີ່ມທະວີການຮ່ວມມືໃນຂົງເຂດຕ່າງໆ ເຊັ່ນ ການກໍ່ສ້າງພື້ນຖານໂຄງລ່າງ,ການພັດທະນາພະລັງງານ, ເຂດຮ່ວມມືເສດຖະກິດ,ແລະອື່ນໆ, ເປີດກວ້າງຜົນປະໂຫຍດຮ່ວມ. ສືບຕໍ່ຈັດກິດຈະກຳສະເຫຼີມສະຫຼອງວັນຄົບຮອບ55ປີຂອງການສ້າງຕັ້ງສາຍພົວພັນທາງການທູດລະຫວ່າງສອງປະເທດໃຫ້ດີ, ເພີ່ມທະວີການແລກປ່ຽນແລະການຮ່ວມມືໃນຂົງເຂດການສຶກສາ, ວັດທະນະທຳ, ການທ່ອງທ່ຽວ, ການປະຕິບັດກົດໝາຍແລະຄວາມປອດໄພແລະອື່ນໆ. ແນວໃດກໍດີປະເທດລາວເຂົ້າຮ່ວມກອງປະຊຸມສຸດຍອດG20ຫັງໂຈ່ວໃນຖານະເປັນປະເທດປະທານໝູນວຽນອາຊຽນນັ້ນມີຄວາມໝາຍສຳຄັນຫຼາຍ.ພວກຂ້າພະເຈົ້າຍິນດີຮ່ວມກັບຝ່າຍຕ່າງໆລວມທັງລາວ, ຊຸກຍູ້ໃຫ້ກອງປະຊຸມສຸດຍອດຄັ້ງນີ້ໄດ້ຮັບຜົນຕາມຄາດໝາຍ.
ທ່ານບຸນຍັງ ວໍລະຈິດກ່າວວ່າ, ຂອບໃຈນຳຈີນທີ່ເຊີນປະເທດລາວເຂົ້າຮ່ວມກອງປະຊຸມສຸດຍອດG20, ແລະຕີລາຄາສູງຕໍ່ຈີນທີ່ຖືການພັດທະນາເປັນຫົວຂໍ້ສຳຄັນ, ທັງທຳຄວາມພະຍາຍາມເພື່ອຊຸກຍູ້ໃຫ້ກອງປະຊຸມປະສົບຜົນສຳເລັດ. ປັດຈຸບັນນີ້, ສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນໄດ້ຂະຫຍາຍຕົວຢ່າງວ່ອງໄວ, ການຢ້ຽມຢາມເຊິ່ງກັນແລະກັນລະຫວ່າງການນຳຂັ້ນສູງມີຂຶ້ນເລື້ອຍໆ, ການຮ່ວມມືໃນຂົງເຂດຕ່າງໆກ້າວໄປໜ້າຢ່າງບໍ່ຢຸດຢັ້ງ, ເຊິ່ງໄດ້ນຳເອົາຜົນປະໂຫຍດອັນແທ້ຈິງໃຫ້ແກ່ປະຊາຊົນສອງຊາດ. ລາວສືບຕໍ່ສະໜັບສະໜູນ ຈີນສືບຕໍ່ເສີມຂະຫຍາຍບົດບາດອັນສຳຄັນໃນວຽກງານສາກົນກໍຄືພາກພື້ນ, ແລະຍິນດີເພີ່ມທະວີການແລກປ່ຽນແລະການປະສານງານກັບຈີນຢ່າງໃກ້ຊິດ.
