ທ່ານສີຈິ້ນຜີງສະເໜີນະໂຍບາຍຂອງຈີນໃນພິທີເປີດກອງປະຊຸມສຸດຍອດB20
2016-09-03 20:04:39 cri
ຕອນບ່າຍວັນທີ3ກັນຍານີ້, ກອງປະຊຸມສຸດຍອດອຸດສາຫະກຳການຄ້າກຸ່ມ20ປະເທດ ຫຼື B20ໄດ້ຈັດຂຶ້ນຢ່າງຄຶກຄື້ນຢູ່ເມືອງຫັງໂຈ່ວແຂວງເຈີ້ຈ່ຽງສປຈີນ. ພາຍໃຕ້ເບື້ອງຫຼັງໃຫຍ່ທີ່ເສດຖະກິດໂລກຟື້ນຕົວຢ່າງຊັກຊ້ານັ້ນ, ທ່າອ່ຽງພັດທະນາຂອງເສດຖະກິດຈີນໄດ້ຮັບຄວາມສົນໃຈຫຼາຍ.ໃນພິທີເປີດປະຊຸມ, ທ່ານສີຈິ້ນຜີງໄດ້ກ່າວປາໄສ, ເພື່ອຕອບສະໜອງຄວາມເອົາໃຈໃສ່ຂອງໂລກທີ່ມີຕໍ່ປະເທດຈີນ.
ທ່ານສີຈິ້ນຜີງກ່າວວ່າ,ປະເທດຈີນໃນມື້ນີ້,ໄດ້ຢືນຢູ່ຈຸດເລີ່ມຕົ້ນໃໝ່ທາງປະຫວັດສາດ, ເຊິ່ງຈຸດເລີ່ມຕົ້ນໃໝ່ນີ້ກໍຄືຈຸດເລີ່ມຕົ້ນໃໝ່ຂອງຈີນທີ່ລົງເລິກການປະຕິຮູບຢ່າງຮອບດ້ານ, ເພີ່ມພະລັງແຮງໃໝ່ເພື່ອຊຸກຍູ້ການພັດທະນາເສດຖະກິດສັງຄົມ, ກໍຄືຈຸດເລີ່ມຕົ້ນໃໝ່ທີ່ຈີນທຽບທັນກັບສະພາວະປົກກະຕິອັນໃໝ່ໃນການພັດທະນາເສດຖະກິດແລະຫັນປ່ຽນຮູບແບບການພັດທະນາເສດຖະກິດ, ແລະກໍຄືຈຸດເລີ່ມຕົ້ນໃໝ່ທີ່ຈີນລົງເລິກການແລກປ່ຽນກັບໂລກ,ແລະລົງເລິກການເປີດກວ້າງຕໍ່ໂລກ. ດັ່ງນັ້ນ, ໃນຈຸດເລີ່ມຕົ້ນໃໝ່ນີ້, ຈີນຈະເຮັດແນວໃດເພື່ອພັດທະນາເສດຖະກິດປະເທດຕົນ? ທ່ານສີຈິ້ນຜີງໄດ້ໃຫ້ຄຳຕອບດ້ວຍ "5 ເດັດດ່ຽວ".
"ໃນຈຸດເລີ່ມຕົ້ນໃໝ່, ພວກຂ້າພະເຈົ້າຈະເດັດດ່ຽວລົງເລິກການປະຕິຮູບຢ່າງຮອບດ້ານ,ບຸກເບີກອະນາຄົດການພັດທະນາທີ່ດີງາມກວ່າເກົ່າ; ໃນຈຸດເລີ່ມຕົ້ນໃໝ່,ພວກຂ້າພະເຈົ້າຈະເດັດດ່ຽວປະຕິບັດຍຸດທະສາດຊຸກຍູ້ການພັດທະນາດ້ວຍການປະດິດສ້າງໃໝ່, ກະຕຸກຊຸກຍູ້ການພັດທະນາຢ່າງແຂງແຮງກວ່າເກົ່າ; ໃນຈຸດເລີ່ມຕົ້ນໃໝ່,ພວກຂ້າພະເຈົ້າຈະເດັດດ່ຽວຊຸກຍູ້ການພັດທະນາແບບສີຂຽວ, ສະແຫວງຫາປະສິດທິຜົນທີ່ມີຄຸນນະພາບສູງກວ່າເກົ່າ; ໃນຈຸດເລີ່ມຕົ້ນໃໝ່,ພວກເຮົາຈະເດັດດ່ຽວຊຸກຍູ້ການຊົມໃຊ້ຢ່າງສະເໝີພາບ, ເສີມສ້າງຜົນປະໂຫຍດຫຼາຍກວ່າເກົ່າໃຫ້ແກ່ປະຊາຊົນ; ໃນຈຸດເລີ່ມຕົ້ນໃໝ່,ພວກຂ້າພະເຈົ້າຈະເດັດດ່ຽວເປີດກວ້າງການເປີດປະຕູສູ່ພາຍນອກ, ບັນລຸຕ່າງຝ່າຍຕ່າງມີຜົນປະໂຫຍດຢ່າງກວ້າງຂວາງກວ່າເກົ່າ."
ປັດຈຸບັນນີ້,ເສດຖະກິດໂລກພັດທະນາຊັກຊ້າ, ຈັງຫວະເຕີບໂຕຂອງການຄ້າສາກົນຢູ່ໃນລະດັບຕ່ຳສຸດໃນຮອບ30ປີມານີ້. ພ້ອມດຽວກັນນັ້ນ,ລັດທິປົກປ້ອງການຄ້າຟື້ນຟູຄືນໃໝ່,ລະບຽບການການຄ້າຫຼາຍຝ່າຍຜະເຊີນກັບຄວາມຫຍຸ້ງຍາກໃນການຂະຫຍາຍຕົວ, ຄວາມປັ່ນປ່ວນແລະການປະທະກັນດ້ານການເມືອງ,ວິກິດການຊາວອົບພະຍົບ,ການປ່ຽນແປງດິນຟ້າອາກາດ, ລັດທິກໍ່ການຮ້າຍແລະບັນຫາຈຸດຮ້ອນໃນພາກພື້ນແລະສິ່ງທ້າທາຍລັກສະນະທົ່ວໂລກໄດ້ເພີ່ມຄວາມສັບສົນແລະຄວາມສ່ຽງຕໍ່ເສດຖະກິດໂລກ. ພາຍໃຕ້ເບື້ອງຫຼັງດັ່ງກ່າວ, ປະຊາຄົມໂລກໄດ້ມີຄາດຫວັງສູງຕໍ່ປະເທດຈີນ. ໃນການກ່າວປາໄສ, ທ່ານສີຈິ້ນຜີງໄດ້ໃຫ້ຕຳລາຢາຈີນຢ່າງໜຶ່ງໃຫ້ແກ່ເສດຖະກິດໂລກທີ່ມີການປ່ຽນແປງຢ່າງສັບສົນ.ທ່ານກ່າວວ່າ: " ຈີນຫວັງວ່າຈະສາມາດຮ່ວມກັບບັນດາຝ່າຍຊຸກຍູ້ໃຫ້ກອງປະຊຸມສຸດຍອດ G20 ຫັງໂຈ່ວວາງຂໍ້ສະເໜີດ້ານນະໂຍບາຍໂດຍລວມທີ່ສາມາດແກ້ໄຂບັນຫາຈາກກົກຮາກໄດ້,ຊຸກຍູ້ໃຫ້ເສດຖະກິດໂລກເດີນຕາມເສັ້ນທາງແຫ່ງການເຕີບໂຕທີ່ແຂງແຮງ,ແບບຍືນຍົງ,ມີຄວາມດຸນດ່ຽງແລະກວມລວມ. ໜຶ່ງ,ສ້າງເສດຖະກິດໂລກທີ່ມີຫົວຄິດປະດິດສ້າງ,ສ້າງເງື່ອນໄຂເພື່ອຊຸກຍູ້ການເຕີບໂຕ. ສອງ,ສ້າງເສດຖະກິດໂລກແບບເປີດກວ້າງ,ຂະຫຍາຍຊ່ອງທາງແຫ່ງການພັດທະນາ. ສາມ, ສ້າງເສດຖະກິດໂລກແບບມີບົດບາດຊຸກຍູ້ກັນ,ເຕົ້າໂຮມກຳລັງຈາກການໄປມາຫາສູ່ກັນ. ແລະສີ່,ສ້າງເສດຖະກິດໂລກແບບກວມລວມ, ສ້າງພື້ນຖານອັນໝັ້ນແກ່ນເພື່ອໃຫ້ຕ່າງຝ່າຍຕ່າງມີຜົນປະໂຫຍດ. "
ຄວາມເປັນຈິງແລ້ວ,ເພື່ອແທດເໝາະກັບຕຳລາຢາຈີນດັ່ງກ່າວ,ກອງປະຊຸມສຸດຍອດG20ຫັງໂຈ່ວໄດ້ເນັ້ນຫົວຂໍ້"ສ້າງເສດຖະກິດໂລກທີ່ປະດິດສ້າງໃໝ່,ຄວາມມີຊີວິດຊີວາ, ມີບົດບາດຊຸກຍູ້ກັນແລະກວມລວມ." ສຳລັບກົນໄກG20ທີ່ເປັນເວທີສຳຄັນໃນການຄຸ້ມຄອງເສດຖະກິດໂລກ, ຄວນເຮັດແນວໃດເພື່ອປັບປຸງການຄຸ້ມຄອງເສດຖະກິດໂລກ? ກ່ຽວກັບເລື່ອງນີ້, ທ່ານສີຈິ້ນຜີງກ່າວວ່າ,"ພາຍໃຕ້ສະພາບການໃນປັດຈຸບັນນີ້, ການຄຸ້ມຄອງເສດຖະກິດໂລກຄວນກຳແໜ້ນຈຸດສຳຄັນດັ່ງນີ້: ຮ່ວມກັນສ້າງໂຄງປະກອບຄຸ້ມຄອງການທະນາຄານໂລກທີ່ຍຸດຕິທຳແລະມີປະສິດທິພາບສູງ, ຮັກສາຄວາມໝັ້ນທ່ຽງຂອງເສດຖະກິດໂລກ; ຮ່ວມກັນສ້າງໂຄງປະກອບຄຸ້ມຄອງການຄ້າແລະການລົງທຶນໂລກທີ່ເປີດເຜີຍແລະ ໂປ່ງໃສ, ປັບປຸງລະບຽບການການຄ້າຫຼາຍຝ່າຍ, ປ່ອຍກຳລັງບົ່ມຊ້ອນໃນການຮ່ວມມືດ້ານເສດຖະກິດການຄ້າແລະການລົງທຶນຂອງໂລກ; ຮ່ວມກັນສ້າງໂຄງປະກອບຄຸ້ມຄອງພະລັງງານໂລກແບບສີຂຽວແລະກາກບອນຕໍ່າຊຸກຍູ້ການຮ່ວມມືດ້ານການພັດທະນາສີຂຽວທົ່ວໂລກ; ຮ່ວມກັນສ້າງໂຄງປະກອບປັບປຸງການພັດທະນາຂອງໂລກທີ່ກວມລວມແລະມີບົດບາດຊຸກຍູ້ກັນ, ຖືການຈັດຕັ້ງປະຕິບັດວາລະພັດທະນາແບບຍືນຍົງ2030ຂອງສະຫະປະຊາຊາດເປັນເປົ້າໝາຍ, ຮ່ວມກັນເສີມສ້າງຄວາມຜາສຸກຂອງມວນມະນຸດ."
