ທ່ານເຟືອງສີ ເລົ່າຝູງ ຫົວໜ້າສະຖາບັນຄົ້ນຄວ້າເສດຖະກິດສະຖາບັນວິທະຍາສາດສັງຄົມແຫ່ງຊາດລາວໄດ້ໃຫ້ສຳພາດຕໍ່ນັກຂ່າວ CRI ໃນວັນທີ 2 ກັນຍານີ້ວ່າ, ກອງປະຊຸມສຸດຍອດ G20 ຫັງໂຈ່ວແມ່ນກອງປະຊຸມສຸດຍອດ G20 ຄັ້ງໜຶ່ງ ທີ່ມີປະເທດພວມພັດທະນາເຂົ້າຮ່ວມຫຼາຍທີ່ສຸດ, ເຊິ່ງໄດ້ສະແດງໃຫ້ເຫັນເຖິງຄວາມຮັບຜິດຊອບຂອງຈີນທີ່ເປັນປະເທດໃຫຍ່. ຂະນະທີ່ຝ່າຍລາວໄດ້ເອົາໃຈໃສ່ຫຼາຍຫົວຂໍ້, ທັງຫວັງວ່າກອງປະຊຸມຄັ້ງນີ້ຈະໄດ້ຮັບໝາກຜົນຕາມຄາດໝາຍ.
ທ່ານເຟືອງສີກ່າວວ່າ, ຫຼັງຈາກວິກິດການທາງການເງິນໂລກເກີດຂຶ້ນໃນປີ 2008 ເປັນຕົ້ນມາ, ເສດຖະກິດທົ່ວໂລກຖົດຖອຍ, ຫຼາຍປະເທດປະສົບກັບຄວາມຫຍຸ້ງຍາກຕ່າງໆນານາ. ຂະນະທີ່ນອກຈາກຮັບປະກັນຄວາມປອດໄພຂອງກອງປະຊຸມສຸດຍອດ ຄັ້ງນີ້ແລ້ວ, ຈີນຍັງໄດ້ກຽມຫົວຂໍ້ແລະຂໍ້ລິເລີ່ມຕ່າງໆທີ່ມີການປະດິດສ້າງໃໝ່ເພື່ອຊຸກຍູ້ໃຫ້ເສດຖະກິດໂລກຟື້ນຕົວ, ແກ້ໄຂບັນຫາຍາກທີ່ປະສົບໃນການພັດທະນາຂອງບັນດາປະເທດ. ທັງນີ້ໄດ້ສະແດງໃຫ້ເຫັນເຖິງຄວາມຮັບຜິດຊອບຂອງຈີນທີ່ເປັນປະເທດໃຫຍ່. ທ່ານກ່າວວ່າ:
ຈີນແມ່ນປະເທດໃຫຍ່ທີ່ມີຄວາມຮັບຜິດຊອບ. ໃນບໍ່ຊຸມປີຜ່ານມານີ້, ເສດຖະກິດຈີນໄດ້ຮັກສາການເຕີບໂຕຢ່າງໝັ້ນທ່ຽງແລະວ່ອງໄວໂດຍຕະຫຼອດແລະໄດ້ເສີມຂະຫຍາຍບົດບາດນຳພາໃນການພັດທະນາເສດຖະກິດໂລກ ເຊື່ອໝັ້ນວ່າ ຈີນຈະເສີມຂະຫຍາຍບົດບາດອັນສຳຄັນ ໃນກອງປະຊຸມສຸດຍອດ G20 ຫັງໂຈ່ວ. ແນວໃດກໍດີ, ຂ້າພະເຈົ້າຫວັງວ່າກອງປະຊຸມຄັ້ງນີ້ຈະໄດ້ຮັບໝາກຜົນຕາມຄາດຫວັງ, ກະຕຸ້ນເສດຖະກິດໂລກ, ເຮັດໃຫ້ປະເທດດ້ອຍພັດທະນາໄດ້ໂອກາດຈາກການພັດທະນາຂອງປະເທດທີ່ພັດທະນາແລ້ວ."
ທ່ານເຟືອງສີກ່າວຕື່ມວ່າ: ທ່ານໄດ້ໃສ່ໃຈວ່າ, ໃນຂະນະທີ່ເອົາໃຈໃສ່ການພັດທະນາແບບຍຶນຍົງຂອງເສດຖະກິດໂລກ ປະເທດດ້ອຍພັດທະນາຈະບັນລຸການພັດທະນາປະເທດຕົນແນວໃດກໍ່ແມ່ນຫົວຂໍ້ ສຳຄັນຂອງກອງປະຊຸມສຸດຍອດ G20 ເຊັ່ນກັນ. ທ່ານຫວັງວ່າກອງປະຊຸມຄັ້ງນີ້ສາມາດບັນລຸຄວາມຮັບຮູ້ທີ່ເປັນເອກະພາບກັນໃນດ້ານນະໂຍບາຍການເງິນແລະການລົງທຶນເປັນຕົ້ນ, ສະໜັບສະໜູນແລະຊ່ອຍປະເທດດ້ອຍພັດທະນາຫຼຸດຜ່ອນຄວາມແຕກໂຕນທາງການພັດທະນາກັບປະເທດທີ່ພັດທະນາແລ້ວ.
ນອກນີ້, ທ່ານເຟືອງສີຍັງຊີ້ອອກວ່າ, ການຮັກສາຄວາມໝັ້ນທ່ຽງຂອງອັດຕາແລກປ່ຽນເງິນຕາຂອງບັນດາປະເທດກໍ່ແມ່ນຫົວຂໍ້ທີ່ຕ້ອງແກ້ໄຂ, ຂະນະທີ່ອັດຕາແລກປ່ຽນທີ່ໝັ້ນທ່ຽງກໍມີຜົນດີຕໍ່ການພັດທະນາເສດຖະກິດໂລກ.
