ທ່ານ ສິຈິ້ນຜິງ ປະທານປະເທດຈີນໄດ້ກ່າວປາຖະກະຖາໃນພິທີໄຂກອງປະຊຸມສຸດຍອດອຸດສາຫະກຳ-ການຄ້າຂອງ G20 ຫຼື B20 ໂດຍສະເໜີໃຫ້ປະເທດສະມາຊິກ G20 ຮ່ວມກັບປະຊາຄົມໂລກ, ມີອຸດົມຄະຕິທີ່ເດັດດ່ຽວໜຽວແໜ້ນແລະໃຊ້ມາດຕະການໃນທັນທີເພື່ອທຳຄວາມພະຍາຍາມໃນ 3 ດ້ານດັ່ງລຸ່ມນີ້ຄື:
1. ຮ່ວມກັນປົກປັກຮັກສາສະພາບແວດລ້ອມສາກົນທີ່ມີສັນຕິພາບແລະສະຖຽນລະພາບ. ປະຫວັດສາດໄດ້ຢືນຢັນຫຼາຍເທື່ອແລ້ວວ່າ, ຖ້າຫາກບໍ່ມີສັນຕິພາບກໍບໍ່ມີການພັດທະນາແລະຖ້າຫາກບໍ່ມີສະຖຽນລະພາບກໍບໍ່ມີຄວາມຈະເລີນຮຸ່ງເຮືອງ. ຄວາມໝັ້ນຄົງຂອງປະເທດຕ່າງໆມີການພົວພັນຢ່າງແໜ້ນແຟ້ນໂດຍບໍ່ມີປະເທດໃດສາມາດລອດໄດ້ແລະກໍບໍ່ມີປະເທດໃດສາມາດແບກຫາບໜ້າທີ່ທຸກປະການ.
2.ຮ່ວມກັນສ້າງສາຍພົວພັນຄູ່ຮ່ວມມືສາກົນແບບຕ່າງຝ່າຍຕ່າງມີຜົນປະໂຫຍດ. ປະເທດໃດໜຶ່ງບໍ່ວ່າຈະເປັນປະເທດໃຫຍ່ຫຼືນ້ອຍ, ຈະເຂັ້ມແຂງຫຼືອ່ອນແອແລະບໍ່ວ່າຈະຮັ່ງມີຫຼືທຸກຍາກກໍຕາມລ້ວນແຕ່ຄວນປະຕິບັດຕໍ່ກັນຢ່າງສະເໝີພາບ. ຂະນະທີ່ພັດທະນາປະເທດຕົນໃຫ້ດີກໍຄວນຊ່ວຍເຫຼືອພັດທະນາປະເທດອື່ນໃຫ້ດີເຊັ່ນກັນ. ຕ່າງຝ່າຍຕ່າງພັດທະນາໃຫ້ດີຈຶ່ງສາມາດສ້າງໜ່ວຍໂລກທີ່ສວຍງາມກວ່າເກົ່າໄດ້.
3.ຮ່ວມກັນປັບປຸງການຄຸ້ມຄອງເສດຖະກິດໂລກໃຫ້ດີຂຶ້ນກວ່າເກົ່າໂດຍຄວນຖືເອົາຄວາມສະເໝີພາບກັນເປັນພື້ນຖານ, ຖືເອົາການເປີດປະຕູເປັນທິດນຳ, ຖືເອົາການຮ່ວມມືເປັນພະລັງແຮງແລະຖືເອົາການຊົມໃຊ້ຮ່ວມກັນເປັນເປົ້າໝາຍ.
 |
