ທ່ານສີຈິ້ນຜີງກ່າວວ່າ, ປະເທດທີ່ເປັນຕະຫຼາດພັດທະນາໃໝ່ແລະປະເທດພວມພັດທະນາຫຼາຍປະເທດພັດທະນາຈະເລີນຂຶ້ນຮ່ວມກັນ, ເປັນການປ່ຽນແປງຢ່າງໜຶ່ງທີ່ມີຄວາມໝາຍອັນເລິກເຊິ່ງທີ່ສຸດໃນສາຍພົວພັນສາກົນໃນຍຸກປັດຈຸບັນ. ປະເທດບຼິກສ໌ເປັນຜູ້ນຳໜ້າໃນປະເທດທີ່ເປັນຕະຫຼາດຈະເລີນໃໝ່ແລະປະເທດພວມພັດທະນາ, ແລະກໍແມ່ນສະມາຊິກສຳຄັນຂອງກຸ່ມ20ປະເທດ. ພວກຂ້າພະເຈົ້າຄວນເດີນໄປຕາມເສັ້ນທາງປະຫວັດສາດ, ກຳແໜ້ນສະພາວະລວມຂອງສາກົນ, ເພີ່ມທະວີການປະສານງານແລະປະສານສົມທົບກັນ, ຮ່ວມກັນສ້າງເວທີປະເທດບຼິກສ໌ແລະກຸ່ມ20ປະເທດທີ່ມີຄວາມສຳຄັນນີ້ໃຫ້ດີ, ຮັກສາແລະພັດທະນາໃຫ້ດີ, ຊຸກຍູ້ໃຫ້ປະເທດທີ່ເປັນຕະຫຼາດຈະເລີນໃໝ່ແລະປະເທດພວມພັດທະນາເສີມຂະຫຍາຍບົດບາດຫຼາຍກວ່າເກົ່າໃນວຽກງານສາກົນ, ແລະມີຖານະທີ່ເປັນເຈົ້າການຫຼາຍກວ່າເກົ່າໃນການຄຸ້ມຄອງວຽກງານສາກົນ.
ນັບແຕ່ຕົ້ນປີນີ້ມາ, ພາຍໃຕ້ຄວາມພະຍາຍາມຂອງ5ປະເທດ ແລະການຊຸກຍູ້ຢ່າງແຂງແຮງຂອງອິນເດຍທີ່ເປັນປະເທດປະທານ, ການຮ່ວມມືລະຫວ່າງປະເທດບຼິກສ໌ໄດ້ຮັກສາທ່າອ່ຽງທີ່ດີໃນການຂະຫຍາຍຕົວ, ໄດ້ເປີດກວ້າງຂົງເຂດການຮ່ວມມືຕື່ມອີກ, ແລະໄດ້ຮັບຜົນສຳເລັດອັນພົ້ນເດັ່ນ. ໂດຍສະເພາະໃນການແລກປ່ຽນດ້ານວັດທະນະທຳ, ຖືວ່າມີຄວາມອຸດົມສົມບູນແລະມີຈຸດປະກາຍຫຼາກຫຼາຍ. ຂ້າພະເຈົ້າຫວັງວ່າການພົບປະບໍ່ເປັນທາງການໃນມື້ນີ້ຈະໄດ້ຮັບໝາກຜົນອັນຈົບງາມ, ເພື່ອກຽມພ້ອມໃຫ້ແກ່ກອງປະຊຸມສຸດຍອດG20ຫັງໂຈ່ວທີ່ຈະຈັດຂຶ້ນໃນຕອນບ່າຍມື້ນີ້, ແລະເປັນການສ້າງພື້ນຖານໃຫ້ແກ່ການພົບປະຄັ້ງທີ8ຂອງຜູ້ນຳປະເທດບຼິກສ໌ທີ່ຈະຈັດຂຶ້ນຢູ່ອິນເດຍໃນເດືອນໜ້າ.
