ກອງປະຊຸມສຸດຍອດກຸ່ມ 20 ປະເທດ ຫຼື G20 ຄັ້ງທີ 11 ໄດ້ຈັດຂຶ້ນຢູ່ເມືອງຫັງໂຈ່ວ ສປ ຈີນໃນວັນທີ 4 ກັນຍານີ້, ທ່ານ ດຣ. ຊູດິບ ຊິງ ຜູ້ຊ່ຽວຊານຊາວອິນເດຍ ຈາກຄະນະວິຊາການເມືອງ ມະຫາວິທະຍາໄລນິຕິສາດ-ລັດຖະສາດຮວາຕົ່ງຈີນ ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ວ່າ: ຈີນກຳລັງພະຍາຍາມເສີມຂະຫຍາຍບົດບາດນຳພາເສດຖະກິດໂລກ ແລະນຳພາທົ່ວໂລກບັນລຸການພັດທະນາໂດຍສັນຕິ.
ທ່ານ ດຣ. ຊູດິບ ຊິງ ກ່າວວ່າ: ໃນກອງປະຊຸມສຸດຍອດຄັ້ງນີ້ ບໍ່ພຽງແຕ່ມີສະມາຊິກກຸ່ມ 20 ປະເທດເຂົ້າຮ່ວມເທົ່ານັ້ນ, ຈີນຍັງໄດ້ເຊີນປະເທດພວມພັດທະນາຫຼາຍປະເທດເຂົ້າຮ່ວມນຳອີກດ້ວຍ ເຊິ່ງແຕກຕ່າງຈາກກອງປະຊຸມສຸດຍອດທຸກຄັ້ງຜ່ານມາ ແລະພຽງແຕ່ເບິ່ງບັນຊີລາຍຊື່ຂອງຜູ້ແທນທີ່ເຂົ້າຮ່ວມກອງປະຊຸມແລ້ວ ກໍສາມາດເຫັນໄດ້ຄວາມພະຍາຍາມຂອງຈີນໃນການຍົກສູງສິດປະກອບຄຳເຫັນໃນສາກົນຂອງປະເທດພວມພັດທະນາ ແລະຊຸກຍູ້ໃຫ້ເສດຖະກິດໂລກຟື້ນຕົວ.
ທ່ານຊູດິບ ຊິງ ກ່າວຕື່ມວ່າ: ທ່າທີອັນຈິງຈັງທັງຕິດແທດຕົວຈິງຂອງລັດຖະບານຈີນໄດ້ເຮັດໃຫ້ຂ້າພະເຈົ້າຍົກຍ້ອງຊື່ນແລະຊົມຢ່າງເລິກເຊິ່ງມາໂດຍຕະຫຼອດ. ແນວໃດກໍດີ, ຈີນ ແລະ ອິນເດຍ ລ້ວນແຕ່ເປັນປະເທດສະມາຊິກບຣິກສ໌ ແລະ ສະມາຊິກກຸ່ມ 20 ປະເທດ ຈະສາມາດຮ່ວມມືກັນ ເພື່ອຊອກຫາການພັດທະນາແບບຕ່າງຝ່າຍຕ່າງມີຜົນປະໂຫຍດ ແລະຊຸກຍູ້ການພັດທະນາໂດຍສັນຕິໃນພາກພື້ນ ກໍຄືໃນໂລກ.
