ໃນໂອກາດທີ່ທ່ານ ຫຼີເຄິ້ສຽງ ນາຍົກລັດຖະມົນຕີຈີນຈະເດີນທາງໄປນະຄອນຫຼວງວຽງຈັນ ສປປ ລາວ ໃນວັນທີ 6 ກັນຍານີ້ ເພື່ອເຂົ້າຮ່ວມກອງປະຊຸມຜູ້ນຳການຮ່ວມມືອາຊີຕາເວັນອອກແລະກອງປະຊຸມທີ່ກ່ຽວຂ້ອງອື່ນໆລວມທັງກອງປະຊຸມຜູ້ນຳຈີນ-ອາຊຽນຄັ້ງທີ 19 ແລະກອງປະຊຸມສຸດຍອດເພື່ອລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 25 ປີນັ້ນ, ທ່ານ ສິມອນ ໄຕ້ ຫົວໜ້າສະຖາບັນຄົ້ນຄວ້າບັນຫາສາກົນສິງປະໂປໄດ້ໃຫ້ສຳພາດຕໍ່ນັກຂ່າວຫວ່າງມໍ່ໆມານີ້ວ່າ: "ສາຍພົວພັນລະຫວ່າງອາຊຽນ-ຈີນໄດ້ກາຍຂອບການຄ້າໂດຍສອງຝ່າຍໄດ້ສ້າງຕັ້ງສາຍພົວພັນຢ່າງເລິກເຊິ່ງແລະແໜ້ນແຟ້ນຈາກນີ້ຈຶ່ງເຫັນວ່າການຮ່ວມມືລະຫວ່າງຈີນແລະບັນດາປະເທດໃນອາຊຽນສາມາດສືບຕໍ່ພັດທະນາກ້າວເຂົ້າສູ່ລວງເລິກໄດ້."
ທ່ານ ສິມອນ ໄຕ້ ກ່າວຕື່ມວ່າ, ປັດຈຸບັນ, ຈີນໄດ້ກາຍເປັນຄູ່ການຄ້າໃຫຍ່ອັນດັບ 1 ຂອງອາຊຽນຫຼາຍປີຕິດຕໍ່ກັນແລະກໍເຖິງເວລາຊຸກຍູ້ການຮ່ວມມືໃນຂົງເຂດອື່ນໆແລ້ວ. ຈາກມາດຕະການຕ່າງໆຂອງຈີນລວມທັງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ", ການສ້າງຕັ້ງທະນາຄານ AIIB ແລະອື່ນໆໄດ້ສ່ອງແສງໃຫ້ເຫັນວ່າຈີນພວມພະຍາຍາມບຸກເບີກຊ່ອງທາງໃໝ່ໃຫ້ແກ່ການເປີດກວ້າງການຮ່ວມມື. ທ່ານ ສິມອນ ໄຕ້ ກ່າວຕື່ມວ່າ: "ຄວາມພະຍາຍາມຮ່ວມກັນຂອງອາຊຽນແລະຈີນຈະເຮັດໃຫ້ສາຍພົວພັນລະຫວ່າງສອງຝ່າຍພັດທະນາກ້າວສູ່ທິດທາງທີ່ຕັ້ງໜ້າກວ່າເກົ່າ."
 |
