ໃນໂອກາດທີ່ທ່ານຫຼີເຄີ້ສຽງ ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມສຸດຍອດຕ່າງໆຂອງອາຊຽນທີ່ຈັດຂຶ້ນຢູ່ນະຄອນຫຼວງວຽງຈັນແຕ່ວັນທີ 6-9 ກັນຍານີ້ ພ້ອມທັງຈະຢ້ຽມຢາມລາວຢ່າງເປັນທາງການນັ້ນ, ນັກຂ່າວໄດ້ສຳພາດທ່ານກິດຕິ ປຣະເສີດສຸກ ຫົວໜ້າສູນຄົ້ນຄວ້າອາຊີຕາເວັນອອກ ມະຫາວິທະຍາໄລນິຕິສາດ-ລັດຖະສາດໄທ ໂດຍທ່ານຊີ້ວ່າ: ສາຍພົວພັນລະຫວ່າງຈີນ-ອາຊຽນມີທ່າຂະຫຍາຍຕົວດີ, ສອງຝ່າຍມີກຳລັງບົ່ມຊ້ອນທີ່ມະຫາສານ ແລະຜົນການຮ່ວມມືລະຫວ່າງສອງຝ່າຍຈະສ້າງຜົນປະໂຫຍດໃຫ້ແກ່ໄທ ກໍຄືປະເທດອ້ອມຂ້າງຢ່າງແນ່ນອນ.
ສາສະດາຈານ ກິດຕິ ກ່າວວ່າ: ສາຍພົວພັນລະຫວ່າງຈີນແລະອາຊຽນໄດ້ພັດທະນາເປັນຢ່າງດີມາໂດຍຕະຫຼອດ, ຂະນະທີ່ສອງຝ່າຍມີການຮ່ວມມືທັງການລົງທຶນ, ການຄ້າ ແລະ ການທ່ອງທ່ຽວ ເຊິ່ງສາມາດເວົ້າໄດ້ວ່າ ການຮ່ວມມືດ້ານທາງລົດໄຟ ແລະອື່ນໆ ພວມດຳເນີນໄປຢ່າງຄຶກຄັກ. ແນວໃດກໍດີ, ກອງປະຊຸມສຸດຍອດຄັ້ງນີ້ໄດ້ສືບຕໍ່ຫົວຂໍ້ການຮ່ວມມືແລະການພັດທະນາ, ຈະຊຸກຍູ້ການແລກປ່ຽນລະຫວ່າງສອງຝ່າຍຕື່ມອີກ ແລະ ການຮ່ວມມືໃນພາກພື້ນນີ້ກໍມີກຳລັງບົ່ມຊ້ອນທີ່ມະຫາສານ ແລະນອກຈາກໄທຈະວາງຂໍ້ສະເໜີກ່ຽວກັບການຍົກລະດັບການຮ່ວມມືດ້ານການຜະລິດໃນພາກພື້ນໃຫ້ສູງຂຶ້ນໃນກອງປະຊຸມສຸດຍອດອາຊຽນແລ້ວ, ໄທ-ຈີນກໍສາມາດຮ່ວມມືດ້ານນີ້ເຊັ່ນດຽວກັນ.
