ວັນທີ 6 ກັນຍານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງເຖິງນະຄອນຫຼວງວຽງຈັນ ສປປ ລາວເພື່ອເຂົ້າຮ່ວມກອງປະຊຸມສຸດຍອດການຮ່ວມມືອາຊີຕາເວັນອອກພ້ອມດ້ວຍກອງປະຊຸມທີ່ກ່ຽວຂ້ອງຕ່າງໆ ທັງຢ້ຽມຢາມລາວຢ່າງເປັນທາງການ. ທ່ານສັງຂານຈູມຄຳພັນ ນັກວິເຄາະບັນຫາຈີນຜູ້ອາວຸໂສ ທັງເປັນຮອງອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວໄດ້ໃຫ້ສຳພາດຕໍ່ນັກຂ່າວ CRI ໃນວັນທີ 5 ກັນຍານີ້ວ່າ: ການຢ້ຽມຢາມລາວຂອງທ່ານນາຍົກຫຼີເຄີ້ສຽງເທື່ອນີ້ຍ່ອມຈະຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນໃຫ້ຂະຫຍາຍຕົວກ້າວສູ່ລວງເລິກແລະລວງກວ້າງ.
ທ່ານກ່າວວ່າ: ໃນຊຸມປີມໍ່ໆມານີ້, ສາຍພົວພັນລາວ-ຈີນໄດ້ຮັກສາທ່ວງທ່າຂະຫຍາຍຕົວເປັນຢ່າງດີ, ຈີນໄດ້ຊ່ວຍເຫຼືອລ້າແລະປ່ອຍເງິນກູ້ດອກເບັ້ຍຕ່ຳຢ່າງຫຼວງຫຼາຍໃຫ້ແກ່ລາວໃນຫຼາຍດ້ານເປັນຕົ້ນການກໍ່ສ້າງພື້ນຖານໂຄງລ່າງຂະນະທີ່ບໍລິສັດຈີນກໍໄດ້ຮັບເໝົາກໍ່ສ້າງໂຄງການພື້ນຖານໂຄງລ່າງຂອງລາວຢ່າງຫຼວງຫຼາຍ. ປີ 2015 ຜ່ານມາ, ສອງປະເທດໄດ້ເຊັນສັນຍາຮ່ວມກັນກໍ່ສ້າງທາງລົດໄຟຈີນ-ລາວ ເຊິ່ງປັດຈຸ ບັນ ໂຄງການດັ່ງກ່າວກຳລັງດຳເນີນໄປດ້ວຍດີ. ພ້ອມກັນນັ້ນ, ລາວກໍເປັນໜຶ່ງໃນບັນດາປະເທດທີ່ຢູ່ລຽບຕາມ "ໜຶ່ງແລວທາງໜຶ່ງເສັ້ນທາງ"ເຊິ່ງເຊື່ອໝັ້ນວ່າ: ການຢ້ຽມຢາມລາວຂອງທ່ານຫຼີເຄີ້ສຽງເທື່ອນີ້, ສອງຝ່າຍຈະເຊັນເອກະສານຮ່ວມມືຕ່າງໆເຊິ່ງເປັນການຊຸກຍູ້ສາຍພົວພັນ ຄູ່ຮ່ວມມືຍຸດທະສາດຮອບດ້ານລາວ-ຈີນໃຫ້ຂະຫຍາຍຕົວກ້າວສູ່ລວງເລິກແລະລວງກວ້າງ.
 |
