ໂດຍຕອບສະໜອງຕາມຄຳເຊີນຂອງທ່ານທອງລຸນ ສີສຸລິດ ນາຍົກລັດຖະມົນຕີລາວ ປະທານໝູນວຽນອາຊຽນ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ເດີນທາງເຖິງສະໜາມບິນສາກົນວັດໄຕ ນະຄອນຫຼວງວຽງຈັນໃນຕອນຄ່ຳຂອງວັນທີ 6 ກັນຍານີ້ ເພື່ອເຂົ້າຮ່ວມກອງປະຊຸມສຸດຍອດຈີນ-ອາຊຽນ (10+1) ຄັ້ງທີ 19 ກໍຄືກອງປະຊຸມສຸດຍອດລະນຶກຈີນ-ອາຊຽນສ້າງການພົວພັນຄູ່ເຈລະຈາຄົບຮອບ 25 ປີ, ກອງປະຊຸມສຸດຍອດອາຊຽນແລະຈີນ, ຍີ່ປຸ່ນ, ສ.ເກົາຫຼີ (10+3)ຄັ້ງທີ 19 ແລະ ກອງປະຊຸມສຸດຍອດອາຊີຕາເວັນອອກຄັ້ງທີ 11 ພ້ອມທັງຢ້ຽມຢາມລາວຢ່າງເປັນທາງການ.
ໃນໄລຍະເຂົ້າຮ່ວມກອງປະຊຸມ, ທ່ານຫຼີເຄີ້ສຽງ ແລະ ຜູ້ນຳປະເທດໃນອາຊຽນຈະຮ່ວມກັນລະນຶກການສ້າງການພົວພັນຄູ່ເຈລະຈາລະຫວ່າງຈີນ-ອາຊຽນຄົບຮອບ 25 ປີ ທັງຈະພົບປະສອງຝ່າຍກັບຜູ້ນຳບາງປະເທດທີ່ເຂົ້າຮ່ວມກອງປະຊຸມ. ສ່ວນໃນໄລຍະຢ້ຽມຢາມລາວນັ້ນ, ທ່ານຫຼີເຄີ້ສຽງ ຈະພົບປະກັບທ່ານທອງລຸນ ສີສຸລິດ ນາຍົກລັດຖະມົນຕີລາວ ທັງຈະຮ່ວມເປັນສັກຂີພິຍານໃນພິທີເຊັນເອກະສານຮ່ວມມືທີ່ກ່ຽວຂ້ອງລະຫວ່າງສອງປະເທດ. ນອກຈາກນີ້, ທ່ານຍັງຈະເຂົ້າຢ້ຽມຄຳນັບທ່ານບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ແລະ ທ່ານນາງປານີ ຢາທໍ່ຕູ້ ປະທານສະພາແຫ່ງຊາດລາວ ພ້ອມທັງຈະເຂົ້າຮ່ວມກິດຈະກຳວັດທະນະທຳທີ່ກ່ຽວຂ້ອງຕື່ມອີກ.
