ກອງປະຊຸມສຸດຍອດຈີນ-ອາຊຽນຄັ້ງທີ 19 ກໍຄື ກອງປະຊຸມສຸດຍອດລະນຶກຈີນແລະອາຊຽນສ້າງຕັ້ງການພົວພັນຄູ່ເຈລະຈາຄົບຮອບ 25 ປີ ໄດ້ຈັດຂຶ້ນຢູ່ນະຄອນຫຼວງວຽງຈັນ ສປ ລາວ ປະທານໝູນວຽນອາຊຽນ ໃນວັນທີ 7 ກັນຍານີ້.
ກ່ອນໜ້ານີ້, ດຣ. ນາງ ອັກສອນສີ ພານິດສານ ຫົວໜ້າສູນຄົ້ນຄວ້າຍຸດທະສາດໄທ-ຈີນ ສະຖາບັນຄົ້ນຄວ້າແຫ່ງຊາດໄທ ໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ວ່າ: ນີ້ແມ່ນອີກໜຶ່ງກອງປະຊຸມທີ່ມີຄວາມສຳຄັນຫຼາຍ, ຂະນະທີ່ຈີນແລະອາຊຽນຄວນຍຶດໝັ້ນທິດທາງທີ່ຖືກຕ້ອງໂດຍຖືເອົາການຮ່ວມມືເປັນຫຼັກ ແລະບໍ່ຄວນຫວັ່ນໄຫວຄອນແຄນເນື່ອງຈາກປະສົບອຸປະສັກຕ່າງໆ. ທ່ານກ່າວຕື່ມວ່າ: ການຍຶດໝັ້ນລົງເລິກແລະຍົກລະດັບການຮ່ວມມືລະຫວ່າງຈີນ-ອາຊຽນສູງຂຶ້ນ ມີຄວາມສຳຄັນຫຼາຍຕໍ່ປະຊາຊົນໄທແລະປະເທດໃນພາກພື້ນ. ແນວໃດກໍດີ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ສະເໜີຂອບການຮ່ວມມື "2+7" ໃນກອງປະຊຸມສຸດຍອດຈີນ-ອາຊຽນຄັ້ງທີ 16 ທີ່ຈັດຂຶ້ນເມື່ອປີ 2013 ນັ້ນ ໄດ້ມີສ່ວນກ່ຽວຂ້ອງກັບການພັດທະນາໄທແລະພາກພື້ນຢ່າງແຂງແຮງ. ນອກນີ້, ການຮ່ວມມືດ້ານເສດຖະກິດການຄ້າລະຫວ່າງຈີນ-ອາຊຽນບໍ່ຄວນຖືເປັນພຽງແຕ່ພັດທະນາການຄ້າສິນຄ້າ (Tangible Goods Trade)ເທົ່ານັ້ນ, ແຕ່ຄວນຫັນໄປສູ່ການພັດທະນາການຄ້າການບໍລິການ. ຂະນະທີ່ການຮ່ວມມືແລະແລກປ່ຽນດ້ານການພັດທະນາການສຶກສາແລະການທ່ອງທ່ຽວ ກໍແມ່ນຂໍ້ສະເໜີທີ່ດີ.
