ຕອນເຊົ້າວັນທີ 7 ກັນຍານີ້ຢູ່ສູນປະຊຸມແຫ່ງຊາດນະຄອນຫຼວງວຽງຈັນ ສປປ ລາວ, ທ່ານຫຼີເຄີ້ສຽງ ນາຍົກລັດຖະມົນຕີ ສປ ຈີນແລະທ່ານ ທອງລຸນສີສຸລິດ ນາຍົກລັດຖະມົນຕີ ສປປ ລາວໄດ້ເປັນປະທານຮ່ວມກອງປະຊຸມສຸດຍອດຈີນ-ອາຊຽນຫຼື ອາຊຽນບວກ 1 ຄັ້ງທີ 19 ແລະກອງປະຊຸມລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບຮອບ 25 ປີ ໂດຍມີຜູ້ນຳ 10 ປະເທດສະມາຊິກອາຊຽນເຂົ້າຮ່ວມ.
ໂອກາດປະກອບຄຳຄິດເຫັນ, ທ່ານຫຼີເຄີ້ສຽງຢືນຢັນວ່າ: ສາຍພົວພັນຈີນ-ອາຊຽນໄດ້ຜ່ານຜ່າການທົດສອບຈາກສະຖານະການສາກົນທີ່ຜັນແປສັບສົນ ທັງໄດ້ສ້າງແບບຢ່າງທີ່ປະເທດນ້ອຍໃຫຍ່ປະຕິບັດຮ່ວມກັນຢ່າງສະເໝີພາບແລະຮ່ວມກັນສະແຫວງຫາການພັດທະນາ. ຕະ ຫຼອດໄລຍະ 25 ປີຜ່ານມາ, ສອງຝ່າຍໄວ້ເນື້ອເຊື່ອໃຈກັນແລະສະໜັບສະໜູນເຊິ່ງກັນແລະກັນ;ເຮັດໃຫ້ເກີດການເຊື່ອມໂຍງເຂົ້າກັນແລະຮ່ວມມືແບບຕ່າງຝ່າຍຕ່າງມີຜົນປະໂຫຍດ; ສອງຝ່າຍຍຶດໝັ້ນແກ້ໄຂຂໍ້ຂັດແຍ້ງດ້ວຍການເຈລະຈາແລະປຶກສາຫາລືກັນ,ສັນຕິພາບແລະສະເຖຍລະພາບກາຍເປັນຫຼັກແຫ່ງສາຍພົວພັນສອງຝ່າຍ.
ຂະນະດຽວກັນ, ທ່ານຫຼີເຄີ້ສຽງກໍໄດ້ຂໍ້ສະເໜີ 5 ຂໍ້ກ່ຽວກັບການເສີມຂະຫຍາຍສາຍພົວພັນຈີນ-ອາຊຽນຄື:
ໜຶ່ງ: ຂຽນປະຫວັດສາດແຫ່ງສາຍພົວພັນຈີນ-ອາຊຽນໜ້າໃໝ່. ສອງຝ່າຍຄວນເພີ່ມທະວີການເຊື່ອມຕໍ່ເປົ້າໝາຍແລະທິດທາງການ ພັດທະນາ, ສືບຕໍ່ກໍ່ສ້າງປະຊາຄົມຮ່ວມຊະຕາກຳຈີນ-ອາຊຽນໃຫ້ແໜ້ນແຟ້ນຍິ່ງຂຶ້ນ.
ສອງ: ກໍ່ສ້າງເວທີໃໝ່ເພື່ອການຮ່ວມມືດ້ານການເມືອງແລະຄວາມໝັ້ນຄົງ. ຈີນຍິນດີປຶກສາຫາລືກັບປະເທດສະມາຊິກອາຊຽນເພື່ອເຊັນສົນທິສັນຍາຮ່ວມມືແລະໄມຕີຈິດຖານບ້ານໃກ້ເຮືອນຄຽງໂດຍໄວ ເພື່ອສ້າງສິ່ງຄ້ຳປະກັນດ້ານກົດໝາຍໃຫ້ແກ່ມິດຕະພາບຍາວນານຂອງສອງຝ່າຍທັງສະໜັບສະໜູນຄວາມພະຍາຍາມຂອງອາຊຽນເພື່ອສ້າງເຂດປອດອາວຸດນິວເຄລຍອາຊີຕາເວັນອອກສຽງໃຕ້.
ສາມ: ສ້າງພະລັງແຮງໃໝ່ເພື່ອຊຸກຍູ້ການຮ່ວມມືດ້ານເສດຖະກິດການຄ້າ. ຊຸກຍູ້ການຜັນຂະຫຍາຍໝາກຜົນທີ່ກ່ຽວຂ້ອງກັບອະນຸສັນຍາວ່າດ້ວຍການຍົກລະດັບເຂດການຄ້າເສລີຈີນ-ອາຊຽນໃຫ້ປະຕິບັດຕົວຈິງໂດຍໄວ ແລະຍົກລະດັບຄວາມເສລີແລະຄວາມສະດວກໃນການຄ້າແລະການລົງທຶນໃຫ້ສູງຂຶ້ນຕື່ມອີກ.
ສີ່: ສ້າງເຄົາຄ້ຳໃໝ່ເພື່ອການແລກປ່ຽນຮ່ວມມືດ້ານວັດທະນະທຳ ໂດຍຖືເອົາການຮ່ວມມືດ້ານການສຶກສາແລະການທ່ອງທ່ຽວເປັນບູລິມະສິດ, ເພີ່ມເນື້ອໃນການແລກປ່ຽນຮ່ວມມືດ້ານວັດທະນະທຳຕື່ມອີກ ທັງປະດິດສ້າງຮູບແບບການແລກປ່ຽນໃຫ້ຫຼາຍຂຶ້ນແລະຍົກລະດັບການຮ່ວມມືໃຫ້ສູງຂຶ້ນ, ສ້າງການແລກປ່ຽນດ້ານວັດທະນະທຳໃຫ້ເປັນເສົາຄ້ຳໃຫຍ່ທີ 3 ຂອງການຮ່ວມມືຈີນ-ອາຊຽນແລະສຸດທ້າຍຄື ຮ່ວມກັນສ້າງສະພາບການໃໝ່ແຫ່ງການຮ່ວມມືໃນພາກພື້ນ. ເປີດນຳໃຊ້ກອງທຶນສະເພາະການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢ່າງເປັນທາງການເພື່ອສະໜັບສະໜູນໂຄງການແລກປ່ຽນຮ່ວມມືລະຫວ່າງປະເທດອະນຸພາກພື້ນແມ່ນ້ຳຂອງ.
ທ່ານຫຼີເຄີ້ສຽງຍັງກ່າວເນັ້ນວ່າ: ຕະຫຼອດໄລຍະ 25 ປີຜ່ານມາເປັນ "ໄລຍະເຕີບໃຫຍ່"ທີ່ການພົວພັນຈີນ-ອາຊຽນພັດທະນາຢ່າງວ່ອງໄວ, ຂະນະທີ່ 25 ປີຕໍ່ໜ້າຈະເປັນ "ໄລຍະເຕີບໃຫຍ່ສົມບູນ"ທີ່ການພົວພັນສອງຝ່າຍຈະໄດ້ຮັບການຍົກລະດັບແລະມີຄຸນນະພາບສູງຂຶ້ນ. ຈີນຍິນດີຮ່ວມກັບອາຊຽນສ້າງຄວາມໝັ້ນໃຈຢ່າງໜັກແໜ້ນ, ສືບທອດອັນເກົ່າພັດທະນາອັນໃໝ່ເພື່ອຊຸກຍູ້ການພົວພັນສອງຝ່າຍໃຫ້ຂະຫຍາຍຕົວເຂົ້າສູ່ລວງເລິກຮອບດ້ານກວ່າເກົ່າໃນອີກ 25 ປີຕໍ່ໜ້າ ທັງປະກອບສ່ວນເພື່ອສັນຕິພາບວັດທະນາຖາວອນແລະສ້າງຄວາມຈະເລີນຮຸ່ງເຮືອງພ້ອມກັນໃນພາກພື້ນກໍຄືໂລກໃຫ້ຫຼາຍກວ່າເກົ່າ.
 |
