ໃນກອງປະຊຸມສຸດຍອດຈີນ-ອາຊຽນຄັ້ງທີ 19 ທີ່ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ, ຜູ້ນຳຈີນແລະຜູ້ນຳປະເທດໃນອາຊຽນ ໄດ້ຮັບຮອງເອົາ "ທິດທາງກ່ຽວກັບການສ້າງສາຍດ່ວນເຈົ້າໜ້າທີ່ການທູດຂັ້ນສູງເພື່ອຮັບມືກັບສະພາວະສຸກເສີນທາງທະເລລະຫວ່າງຈີນ-ປະເທດໃນອາຊຽນ" ຫຼັງໄດ້ຮ່ວມກັນພິຈາລະນາໃນວັນທີ 7 ກັນຍານີ້.
ທິດທາງດັ່ງກ່າວແມ່ນໜຶ່ງໃນເອກະສານທີ່ເປັນໝາກຜົນສຳຄັນຂອງກອງປະຊຸມ ໂດຍໄດ້ກຳນົດຈຸດປະສົງ, ຂອບເຂດທີ່ເໝາະສຳລັບນຳໃຊ້, ການໃຫ້ນິຍາມສັບວິຊາການ, ການກຳນົດຈຸດພົວພັນກັນ, ລະບຽບການນຳໃຊ້ ແລະອື່ນໆ ຂອງສາຍດ່ວນລະດັບເຈົ້າໜ້າທີ່ການທູດຂັ້ນສູງ ເຊິ່ງເປັນຂີດໝາຍສະແດງໃຫ້ເຫັນວ່າ ສາຍດ່ວນດັ່ງກ່າວໄດ້ເລີ່ມນຳໃຊ້ຢ່າງເປັນທາງການແລ້ວ. ແນວໃດກໍດີ, ພາຍຫຼັງສ້າງສາຍດ່ວນດັ່ງກ່າວແລ້ວ, ເຈົ້າໜ້າທີ່ຂັ້ນສູງກະຊວງການຕ່າງປະເທດຂອງປະເທດຕ່າງໆຈະສາມາດແລກປ່ຽນແລະປະສານງານກັນເມື່ອເກີດສະພາບສຸກເສີນ ເພື່ອຄວບຄຸມຄວາມສ່ຽງ, ປຶກສາຫາລືຮ່ວມກັນ ແລະປົກປັກຮັກສາສັນຕິພາບແລະສະຖຽນລະພາບຢູ່ທະເລຈີນໃຕ້.
ການສ້າງສາຍດ່ວນລະດັບເຈົ້າໜ້າທີ່ການທູດຂັ້ນສູງນີ້ ໄດ້ສະແດງໃຫ້ເຫັນຢ່າງເຕັມສ່ວນເຖິງຄວາມປາຖະໜາຂອງຈີນແລະປະເທດໃນອາຊຽນທີ່ດຳເນີນການຮ່ວມມືທາງທະເລຢ່າງແທ້ຈິງໂດຍປິ່ນອ້ອມການຈັດຕັ້ງປະຕິບັດ "ຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້" ຢ່າງຮອບດ້ານແລະມີປະສິດທິຜົນ ແລະຄວາມຕັດສິນໃຈຂອງປະເທດໃນພາກພື້ນທີ່ຮ່ວມມືກັນຄວບຄຸມຄວາມສ່ຽງທາງທະເລ, ປົກປັກຮັກສາສັນຕິພາບແລະສະຖຽນລະພາບຢູ່ທະເລຈີນໃຕ້. ແນວໃດກໍດີ, ຈີນແລະປະເທດໃນອາຊຽນໄດ້ຢັ້ງຢືນດ້ວຍການກະທຳຕົວຈິງອີກເທື່ອໜຶ່ງວ່າ ປະເທດໃນພາກພື້ນມີຄວາມໝັ້ນໃຈ, ມີຄວາມສາມາດ, ມີຄວາມຕັດສິນໃຈ ແລະ ມີຄວາມປາຖະໜາ ໃນການປົກປັກຮັກສາສັນຕິພາບແລະສະຖຽນລະພາບ ແລະຊຸກຍູ້ຄວາມຈະເລີນຮຸ່ງເຮືອງແລະການພັດທະນາໃນພາກພື້ນ.
