ນາຍົກຈີນເນັ້ນຊຸກຍູ້ການຮ່ວມມືທີ່ແທ້ຈິງລະຫວ່າງອາຊຽນກັບຈີນ,ຍີ່ປຸ່ນແລະສ.ເກົາຫຼີ ຢ່າງໜັກແໜ້ນ ປົກປັກຮັກສາສັນຕິພາບແລະສະຖຽນລະພາບຂອງພາກພື້ນ

ຕອນບ່າຍວັນທີ 7 ກັນຍານີ້ ຢູ່ສູນປະຊຸມແຫ່ງຊາດນະຄອນຫຼວງວຽງຈັນ ສປປ ລາວ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຜູ້ນຳອາຊຽນກັບຈີນ,ຍີ່ປຸ່ນແລະສ.ເກົາຫຼີ ຄັ້ງທີ 19 ຫຼື 10+3 ໂດຍຜູ້ນຳ 10 ປະເທດອາຊຽນ,ທ່ານ ຊິນໂຈະ ອາເບະ ນາຍົກລັດຖະມົນຕີຍີ່ປຸ່ນ ແລະ ທ່ານນາງ ປັກກຸນເຮ ປະທານາທິບໍດີ ສ.ເກົາຫຼີ ໄດ້ເຂົ້າຮ່ວມ ແລະ ທ່ານ ທອງລຸນ ສີສຸດລິດ ນາຍົກລັດຖະມົນຕີລາວເປັນປະທານກອງປະຊຸມ.

ທ່ານ ຫຼີເຄີ້ສຽງ ໄດ້ປາໄສວ່າ: ການຮ່ວມມື 10+3 ໄດ້ດຳເນີນມາເປັນເວລາ 19 ປີແລະໄດ້ຮັບໝາກຜົນທີ່ສຳຄັນ ແລະໃນໂອກາດຕ້ອນຮັບການຮ່ວມມື 10+3 ຄົບຮອບ 20 ປີໃນປີໜ້າ, ບັນດາຝ່າຍຄວນຖືນີ້ເປັນຈຸດເລີ່ມຕົ້ນໃໝ່,ປັບປຸງແລະເສີມຂະຫຍາຍບົດບາດຕົ້ນຕໍຂອງ10+3 ໃນຂະບວນການເຊື່ອມໂຍງເຂົ້າກັນຂອງເສດຖະກິດພາກພື້ນ. ແນວໃດກໍດີຂໍ້ສະເໜີ 6 ຂໍ້ກ່ຽວກັບການຮ່ວມມື 10+3 ນີ້ຕ້ອງໄດ້ຮັບການຈັດຕັ້ງປະຕິບັດໃຫ້ປາກົດຜົນເປັນຈິງເຊັ່ນ:
ໜຶ່ງ,ເພີ່ມທະວີການຮ່ວມມືດ້ານຄວາມປອດໄພການເງິນ. ຈີນສະໜັບ
ສະໜູນ 10+3 ຍົກສູງຄວາມສາມາດການຕິດຕາມເສດຖະກິດມະຫາພາກ.
ສອງ,ລົງເລິກການຮ່ວມມືດ້ານການຄ້າແລະການລົງທຶນ ໂດຍຈີນສະໜັບສະໜູນອາຊຽນເສີມຂະຫຍາຍບົດບາດເປັນແກນນຳໃນການເຈລະຈາສັນຍາ RCEP ແລະ ຫວັງວ່າບັນດາຝ່າຍສາມາດເລັ່ງລັດຂະບວນການເຈລະຈາ,ຊຸກຍູ້ການຄ້າຢູ່ໃນພາກພື້ນໃຫ້ມີເສລີພາບແລະສະດວກສະບາຍ.
ສາມ,ຊຸກຍູ້ການຮ່ວມມືດ້ານກະສິກຳແລະຫຼຸດຜ່ອນຄວາມທຸກຍາກ. ຈີນສະໜັບສະໜູນເພີ່ມທະວີການສ້າງກົນໄກຄັງສຳຮອງສຸກເສີນເຂົ້າສານ 10+3,ຈະສືບຕໍ່ຈັດກອງປະຊຸມຄວາມປອດໄພດ້ານສະບຽງອາຫານ 10+3 ໃຫ້ດີ.
ສີ່,ຊຸກຍູ້ການກໍ່ສ້າງການເຊື່ອມຈອດກັນ. ຈີນສະໜັບສະໜູນອາຊຽນວາງ "ແຜນການລວມການເຊື່ອມຈອດກັນອາຊຽນ 2025", ຍິນດີເພີ່ມທະວີການເຊື່ອມຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ກັບແຜນການດັ່ງກ່າວ,ນຳໃຊ້ທະນາຄານລົງທຶນພື້ນຖານໂຄງລ່າງອາຊີຫຼື AIIB ແລະເວທີລະດົມທຶນອື່ນໆເພື່ອລົງເລິກການຮ່ວມມືໃນໂຄງການກັບປະເທດອາຊຽນ.
ຫ້າ,ປະດິດສ້າງຮູບການຮ່ວມມືດ້ານຄວາມສາມາດການຜະລິດໃໝ່ໂດຍຈີນ,ຍີ່ປຸ່ນແລະ ສ.ເກົາຫຼີ ລ້ວນແຕ່ມີທ່າແຮງຂອງຕົນຫຼາຍດ້ານເຊັ່ນ: ການຜະລິດເຄື່ອງປະກອບ, ການກໍ່ສ້າງພື້ນຖານໂຄງລ່າງ,ທຶນຮອນແລະຊັບພະຍາກອນມະນຸດເປັນຕົ້ນ, ຈະສາມາດຄົ້ນຄວ້າປຶກສາຫາລືກ່ຽວກັບການຮ່ວມມືດ້ານຄວາມສາມາດການຜະລິດກັບປະເທດໃນອາຊຽນ.
ຫົກ,ເພີ່ມທະວີການແລກປ່ຽນດ້ານວັດທະນະທຳ. ຈີນສົ່ງເສີມໃຫ້ນັກທ່ອງທ່ຽວຈີນໄປທ່ຽວປະເທດໃນອາຊຽນ. ບັນດາປະເທດຄວນດຳເນີນການຮ່ວມມືເພື່ອຮັບມືກັບບັນຫາຜູ້ຊະລານັບມື້ນັບເພີ່ມຫຼາຍຂຶ້ນ.

ທ່ານ ຫຼີເຄີ້ສຽງ ຊີ້ໃຫ້ເຫັນອີກວ່າ: ການພັດທະນາແລະຄວາມຈະເລີນຮຸ່ງເຮືອງຂອງອາຊີນັ້ນເປັນໄປບໍ່ໄດ້ທີ່ຈະປາສະຈາກສະພາບແວດລ້ອມທີ່ມີສັນຕິພາບແລະສະຖຽນລະພາບເຊິ່ງຈຸດນີ້, ຈີນຍິນດີຮ່ວມກັບບັນດາຝ່າຍພະຍາຍາມເພີ່ມທະວີການຮ່ວມມື 10+3 ເຮັດໃຫ້ພາກພື້ນນີ້ກາຍເປັນເຂດແຫ່ງສັນຕິພາບແລະຄວາມໝັ້ນຄົງ,ກາຍເປັນຫົວຈັກນຳໜ້າໃໝ່ໃນການພັດທະນາເສດຖະກິດຂອງພາກພື້ນ,ປະກອບສ່ວນປົກປັກຮັກສາສັນຕິພາບຂອງໂລກແລະສ້າງຄວາມຜາສຸກໃຫ້ແກ່ປະຊາຊົນຂອງບັນດາປະເທດໃນພາກພື້ນໃຫຍ່ຫຼວງກວ່າເກົ່າ.