ຕອນຄ່ຳວັນທີ 8 ກັນຍານີ້ຢູ່ສຳນັກງານນາຍົກລັດຖະມົນຕີນະຄອນຫຼວງວຽງຈັນ ສປປ ລາວ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານທອງລຸນ ສີສຸລິດ ນາຍົກລັດຖະມົນຕີ ສປປ ລາວ.
ໂອກາດດັ່ງກ່າວ,ທ່ານຫຼີເຄີ້ສຽງໄດ້ສະແດງຄວາມຊົມເຊີຍລາວທີ່ປະສົບຜົນສຳເລັດໃນການເປັນເຈົ້າພາບຈັດກອງປະຊຸມສຸດຍອດການຮ່ວມມືອາຊີຕາເວັນອອກພ້ອມດ້ວຍກອງປະຊຸມກ່ຽວຂ້ອງອື່ນໆ. ທ່ານຫຼີເຄີ້ສຽງຢືນຢັນວ່າ: ຈີນ-ລາວມີຄວາມໄວ້ເນື້ອເຊື່ອໃຈກັນຫຼາຍໃນທາງການເມືອງທັງຮ່ວມມືກັນຢ່າງຮອບດ້ານທາງເສດຖະກິດ ແລະແລກປ່ຽນການເຊື່ອມໂຍງເຂົ້າກັນຢ່າງກວ້າງຂວາງໃນດ້ານວັດທະນະທຳ ເຊິ່ງບໍ່ພຽງແຕ່ສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດເທົ່ານັ້ນ, ຍັງປະກອບສ່ວນເຂົ້າໃນການຮັກສາສັນຕິພາບ,ສະເຖຍລະພາບແລະການພັດທະນາຂອງພາກພື້ນອີກດ້ວຍ. ຈີນຍິນດີຮ່ວມກັບລາວຖືເອົາວັນສ້າງຕັ້ງສາຍພົນພັນທາງການທູດຈີນ-ລາວຄົບຮອບ 55 ປີເປັນໂອກາດທີ່ດີເພື່ອຮັກສາການໄປມາຫາສູ່ກັນຢ່າງສະໜິດແໜ້ນລະຫວ່າງການນຳຂັ້ນສູງ, ເພີ່ມຄວາມເຂົ້າອົກເຂົ້າໃຈດ້ານຍຸດທະສາດແລະປະສານງານກັນ, ຊຸກຍູ້ການຮ່ວມມືຕົວຈິງໃນທຸກຂົງເຂດຢ່າງໜັກໜ້ນແລະຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ລາວໃຫ້ຂະຫຍາຍຕົວຢ່າງບໍ່ຢຸດຢັ້ງ.
ທ່ານຫຼີເຄີ້ສຽງເນັ້ນວ່າຈີນຍິນດີສືບຕໍ່ປະສານງານກັບລາວຢ່າງໃກ້ຊິດແລະສະໜັບສະໜູນເຊິ່ງກັນແລະກັນຢ່າງເດັດດ່ຽວໃນບັນຫາສາກົນແລະພາກພື້ນ. ເພີ່ມທະວີການປະສານສົມທົບກັນຢ່າງໃກ້ຊິດພາຍໃນຂອບຫຼາຍຝ່າຍເຊັ່ນການຮ່ວມມືອາຊີຕາເວັນອອກ, ກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດກໍຄືປະຊາຊົນບັນດາປະເທດໃນພາກພື້ນໃຫ້ຫຼາຍກວ່າເກົ່າ.
ທ່ານທອງລຸນສີສຸລິດຢືນຢັນວ່າ: ການຢ້ຽມຢາມຂອງທ່ານນາຍົກຫຼີເຄີ້ສຽງເທື່ອນີ້ພໍດີກົງກັບລາວ-ຈີນສ້າງຕັ້ງສາຍພົວພັນທາງການທູດຄົບຮອບ 55 ປີ ເຊິ່ງມີຄວາມໝາຍສຳຄັນຍິ່ງຕໍ່ການເສີມຂະຫຍາຍສາຍພົວພັນສອງປະເທດ. ການທີ່ທ່ານນາຍົກຫຼີເຄີ້ສຽງນຳພາຄະນະເຂົ້າຮ່ວມກອງປະຊຸມສຸດຍອດການຮ່ວມມືອາຊີຕາເວັນອອກພ້ອມດ້ວຍກອງປະຊຸມກ່ຽວຂ້ອງອື່ນໆນັ້ນໄດ້ສ່ອງແສງໃຫ້ເຫັນເຖິງມິດຕະພາບລະ ຫວ່າງສອງປະເທດ ທັງເປັນການໃຫ້ກຳລັງໃຈແລະສະໜັບສະໜູນລາວໃນຖານະເປັນປະເທດປະທານໝູນວຽນອາຊຽນຢ່າງຍິ່ງໃຫຍ່. ຂະນະດຽວກັນ, ລາວກໍຊົມເຊີຍຈີນທີ່ໄດ້ປະສົບຜົນສຳເລັດໃນການເປັນເຈົ້າພາບຈັດກອງປະຊຸມສຸດຍອດກຸ່ມ G20 ຫັງໂຈ່ວ. ສາຍພົວພັນທາງການເມືອງແລະການຮ່ວມມືດ້ານເສດຖະກິດການຄ້າແລະການລົງທຶນລະຫວ່າງລາວ-ຈີນໄດ້ຂະຫຍາຍຕົວພ້ອມກັນແລະໄດ້ຮັບໝາກຜົນອັນອຸດົມສົມບູນ. ຈີນມີສ່ວນຮ່ວມໃນການກໍ່ສ້າງພື້ນຖານໂຄງລ່າງ ທັງຊ່ວຍຝຶກອົບຮົມບຸກຄະລາກອນໃຫ້ມີຄວາມສາມາດປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງລາວ. ລາວຍິນດີເພີ່ມທະວີການປະສານງານ,ເລັ່ງຊຸກຍູ້ການຮ່ວມມືໃນໂຄງການທາງລົດໄຟ ທັງສ້າງເງື່ອນໄຂອຳນວຍໃຫ້ແກ່ການຮ່ວມມືດ້ານການລົງທຶນລະຫວ່າງສອງຝ່າຍ ແລະເຊື່ອໝັ້ນວ່າ: ຈາກຄວາມພະຍາຍາມຮ່ວມຂອງສອງຝ່າຍ, ສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນຈະພັດທະນາກ້າວຂຶ້ນສູ່ລະດັບໃໝ່ຢ່າງແນ່ນອນ.
ຫຼັງການພົບປະເຈລະຈາ, ຜູ້ນຳສອງປະເທດໄດ້ເປັນສັກຂີພິຍານໃນພິທີລົງນາມເອກະສານຮ່ວມມື 20 ສະບັບທີ່ກ່ຽວພັນໃນຫຼາຍຂົງເຂດເຊັ່ນການຮ່ວມມືດ້ານຄວາມສາມາດການຜະລິດ, ເສດຖະກິດການຄ້າກັບການລົງທຶນ, ເສດຖະກິດເຕັກນິກ, ການສຶກສາແລະອື່ນໆ. ຂະນະດຽວກັນ ສອງປະເທດຍັງໄດ້ອອກຖະແຫຼງການຮ່ວມຈີນ-ລາວອີກດ້ວຍ.
