ຕາມຂ່າວ CRI: ຫວ່າງມໍ່ໆມານີ້, ກອງປະຊຸມຜູ່ນຳຈີນ-ອາຊຽນຄັ້ງທີ 19 ແລະກອງປະຊຸມສຸດຍອດເພື່ອລະນຶກຈີນ-ອາຊຽນສ້າງຕັ້ງສາຍພົວພັນຄູ່ເຈລະຈາຄົບ ຮອບ 25 ປີໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວ ແລະໄດ້ອອກຖະແຫຼງ ການຮ່ວມໂດຍເປັນເອກະພາບກັນສ້າງສາຍພົວພັນຄູ່ຮ່ວມຍຸດທະສາດຈີນ-ອາຊຽນທີ່ແໜ້ນແຟ້ນກວ່າເກົ່າ. ຂະນະທີ່ວັນທີ 8 ກັນຍານີ້, ທ່ານ ພອນທະວີ ບຸດດາລາ ຫົວໜ້າກົມການຂ່າວກະຊວງການຕ່າງປະເທດລາວໄດ້ໃຫ້ສຳພາດຕໍ່ນັກຂ່າວ CRI ວ່າ, ນີ້ເປັນໝາກຜົນທີ່ສຳຄັນຈາກການຢ້ຽມຢາມລາວຂອງທ່ານ ຫຼີເຄິ້ສຽງ ນາຍົກລັດຖະມົນຕີຈີນແລະຖືວ່າເປັນການຂຽນໜ້າໃໝ່ແຫ່ງການຮ່ວມມືມິດຕະພາບລະຫວ່າງຈີນ-ອາຊຽນ.
ທ່ານ ພອນທະວີ ກ່າວວວ່າ: "25 ປີຜ່ານມາ, 10 ປະເທດອາຊຽນແລະຈີນລ້ວນແຕ່ໄດ້ມີຄວາມພະຍາຍາມຮ່ວມກັນເພື່ອເຮັດໃຫ້ຫຼາຍໜ້າວຽກໄດ້ຮັບໝາກຜົນຕົວຈິງຫຼາຍຂຶ້ນ ໂດຍສະເພາະການຄ້າ, ການສ້າງພື້ນຖານໂຄງລ່າງ, ການພົວພັນແບບບ້ານໃກ້ເຮືອນຄຽງຢູ່ໃນພາກພື້ນອາຊີ ເພື່ອຮັກສາສັນຕິພາບແລະສະຖຽນລະພາບຢູ່ໃນພາກພື້ນນີ້ພ້ອມກັນພັດທະນາ ເຊິ່ງໝາກຜົນຂອງການຮ່ວມມືນີ້ເປັນພື້ນຖານອັນດີໃຫ້ແກ່ການພັດທະນາການພົວພັນລະຫວ່າງອາຊຽນ-ຈີນໃຫ້ນັບມື້ດີຂຶ້ນ."
ນອກນີ້, ທ່ານ ພອນທະວີ ຍັງໄດ້ຕີລາຄາສູງຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ໄດ້ສ້າງກາລະອກາດການພັດທະນາໃຫ້ແກ່ປະເທດຕົນໃນ 3 ປີຜ່ານມານີ້. ທ່ານກ່າວວ່າ: "ຂ້າພະເຈົ້າຄິດວ່າມັນເປັນແນວທາງທີ່ດີເພາະວ່າແນວທາງຂອງສປປ ລາວທີ່ເວົ້າເຖິງຫັນປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມຕິດເຊື່ອມຈອດ, ສ່ວນວ່າ ສປ ຈີນກໍມີແນວທາງນະໂຍບາຍ "ໜຶ່ງແລວທາງໜຶ່ງເສັ້ນທາງ" ເຊິ່ງສອງແນວທາງຖືວ່າເປັນອັນທີ່ດີທີ່ສາມາດເຮັດລວມກັນໄດ້ແລະເຊື່ອມຈອດຮ່ວມກັນ. ເຊິ່ງຢູ່ໃນຫັ້ນ, ໂຄງການທາງລົດໄຟລາວ-ຈີນກໍແມ່ນໂຄງ ການໜຶ່ງທີ່ນອນຢູ່ໃນແນວທາງນະໂຍບາຍຂອງການພັດທະນານີ້. ຂ້າພະເຈົ້າຄິດວ່າ, ໂຄງການໃຫຍ່ໆແລະການປະຕິບັດໃນດ້ານຕ່າງໆຢູ່ແນວທາງນະໂຍບາຍຈະເປັນຜົນປະໂຫຍດຫຼາຍໃຫ້ແກ່ທັງສອງປະເທດລາວ-ຈີນທັງພາກພື້ນນີ້ເພື່ອພ້ອມກັນພັດທະນາໄປສູ່ຄວາມຈະເລີນຮຸ່ງເຮືອງຮ່ວມກັນ."
ທ່ານ ພອນທະວີ ຍັງສະແດງຄວາມຊົມເຊີຍຕໍ່ການອອກອາກາດຂອງ CRI FM 93 ຄົບຮອບ 10 ປີໂດຍກ່າວວ່າ: "ຂ້າພະເຈົ້າກໍຕິດຕາມລາຍການຂອງ CRI ມາຕະຫຼອດແລະຄິດວ່າ CRI ເປັນແຫຼ່ງຂໍ້ມູນຂ່າວສານທີ່ດີ. ນອກນີ້, CRI ກໍໄດ້ມີໝາກຜົນຫຼາຍແລະເຮັດວຽກດ້ວຍຄວາມຫ້າວຫັນເຊິ່ງນອກຈາກກະຈາຍທາງວິທະຍຸແລ້ວຍັງເຜີຍແຜ່ຂ່າວທາງສື່ໃໝ່ເປັນຕົ້ນ Facebook, Wechat ແລະອື່ນໆ, ຖືວ່າໄດ້ເຮັດໃຫ້ປະຊາຊົນໄດ້ຮັບຮູ້ຂໍ້ມູນຢ່າງໄວ. ຂ້າພະເຈົາໃນນາມປະຊາຊົນລາວຜູ້ໜຶ່ງຂໍສະແດງຄວາມຂອບອົກຂອບໃຈຕໍ່ CRI."