ໃນໂອກາດທີ່ທ່ານ ຫຼີເຄິ້ສຽງ ນາຍົກລັດຖະມົນຕີຈີນໄດ້ເດີນທາງເຂົ້າຮ່ວມກອງປະຊຸມຜູ້ນຳການຮ່ວມມືອາຊີຕາເວັນອອກແລະກອງປະຊຸມອື່ນໆແລະຢ້ຽມຢາມ ສປປ ລາວຢ່າງເປັນທາງການແຕ່ວັນທີ 6-9 ກັນຍານີ້, ວົງການຕ່າງໆຂອງລາວເຫັນວ່າ, ການຢ້ຽມຢາມຂອງທ່ານ ຫຼີເຄິ້ສຽງ ຄັ້ງນີ້ໄດ້ຮັບໝາກຜົນຢ່າງຫຼວງຫຼາຍໂດຍຈະລົງເລິກມິດຕະພາບລະຫວ່າງລາວ-ຈີນແລະສ້າງຄວາມຜາສຸກໃຫ້ແກ່ປະຊາຊົນສອງຊາດ.
ທ່ານ ໂພສີ ແກ້ວມະນີວົງ ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວກ່າວວ່າ, ການຢ້ຽມຢາມຂອງທ່ານ ຫຼີເຄິ້ສຽງ ຄັ້ງນີ້ມີຄວາມໝາຍສຳຄັນຍິ່ງຕໍ່ສາຍພົວພັນລະຫວ່າງລາວແລະຈີນ. ສອງປະເທດມີຊາຍແດນຕິດຈອດກັນ, ຈິດໃຈຂອງປະຊາຊົນເຊື່ອມໂຍງເຂົ້າກັນແລະມີມິດຕະພາບຍາວນານແລະໝັ້ນທ່ຽງ, ເປັນຄູ່ຮ່ວມມືຍຸດທະສາດຮອບດ້ານ. ຜູ້ນຳສອງປະເທດໄດ້ແລກປ່ຽນກ່ຽວກັບຂົງເຂດການເມືອງ, ເສດຖະກິດ-ການຄ້າ, ການລົງທຶນແລະວັດທະນະທຳຢ່າງເລິກເຊິ່ງແລະບັນລຸຂໍ້ຕົກລົງເຊິ່ງນີ້ບໍ່ພຽງແຕ່ຈະເຮັດໃຫ້ມິດຕະພາບທີ່ເປັນມູນເຊື້ອລະຫວ່າງສອງປະເທດແໜ້ນແຟ້ນກວ່າເກົ່າເທົ່ານັ້ນແຕ່ຍັງມີຄວາມໝາຍສຳຄັນຕໍ່ສັນຕິພາບ, ສະຖຽນລະພາບຂອງພາກພື້ນກໍຄືຂອງໂລກອີກດ້ວຍ.
ທ່ານ ໄຊຊະນະ ສິດທິພອນ ຫົວໜ້າຫ້ອງການຄະນະກຳມະການຮ່ວມມືລາວ-ຈີນເຫັນວ່າ, ການທີ່ຜູ້ນຳສອງປະເທດລົງນາມໃນສັນຍາເທື່ອນີ້ໄດ້ກວມເອົາການຮ່ວມມືເພີ່ມຂີດຄວາມສາມາດການຜະລິດ, ເສດຖະກິດ-ການ້າແລະການລົງທຶນ, ເຕັກນິກດ້ານເສດຖະກິດ, ການສຶກສາແລະຂົງເຂດອື່ນໆນັ້ນບໍ່ພຽງແຕ່ສ່ອງແສງໃຫ້ເຫັນເຖິງລວງກວ້າງແລະລວງເລິກຂອງສາຍພົວພັນລະຫວ່າງລາວ-ຈີນທີ່ນັບມື້ໄດ້ຮັບການພັດທະນາເທົ່ານັ້ນ, ແຕ່ຍັງເປັນຂີດໝາຍສະແດງໃຫ້ເຫັນວ່າສາຍພົວພັນລະຫວ່າງສອງປະເທດຈະສືບຕໍ່ໄດ້ຮັບການພັດທະນາຫຼາຍຂຶ້ນແລະຈະໄດ້ຮັບໝາກຜົນຫຼາຍກວ່າເກົ່າ.
ທ່ານ ເຂັມທອງ ຊານຸບານ ຮອງອຳນວຍການສຳນັກຂ່າວສານປະເທດລາວກ່າວວ່າ, ເສດຖະກິດຈີນຂະຫຍາຍຕົວຢ່າງວ່ອງໄວໄດ້ສ້າງໂອກາດການພັດທະນາຮ່ວມກັນໃຫ້ແກ່ບັນດາປະເທດໃກ້ຄຽງ ເປັນຕົ້ນການຮ່ວມມືທາງລົດໄຟລາວ-ຈີນທີ່ນອນຢູ່ໃນຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ພວມຊ່ວຍເຫຼືອປະເທດຕົນບັນລຸເປົ້າໝາຍການ "ຫັນປະເທດທີ່ບໍ່ມີຊາຍແດນຕິດກັບທະເລເປັນປະເທດໃຈກາງບໍລິການທາງຜ່ານ". ແນວໃດກໍດີ, ຂໍ້ຕົກລົງຕ່າງໆຂອງຜູ້ນຳສອງປະເທດຈະສືບຕໍ່ຊ່ວຍເຫຼືອປະເທດຕົນບັນລຸເປົ້າໝາຍຫຼຸດພົ້ນອອກຈາກຄວາມດ້ອຍພັດທະນາ.
 |
