ຕອນເຊົ້າວັນທີ 22 ກັນຍານີ້ຕາມເວລາທ້ອງຖິ່ນ, ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ເຂົ້າຢ້ຽມຄຳນັບທ່ານ ໂກຈ໌ ຟູຣີ ປະທານສະພາສູງຢູ່ລັດຖະສະພາທີ່ນະຄອນໂວດາວາ.
ໂອກາດດັ່ງກ່າວ, ທ່ານ ຫຼີເຄີ້ສຽງ ຊີ້ໃຫ້ເຫັນວ່າ, ສະພາສູງແລະສະພາຕ່ຳຂອງການາດາ ເຊິ່ງເປັນອົງການນິຕິບັນຍັດ, ທັງເປັນອົງການຕົວແທນປະຊາຊົນ. ສະນັ້ນ ສະພາປະຊາຊົນແຫ່ງຊາດຈີນມີຄວາມຍິນດີເພີ່ມທະວີການແລກປ່ຽນບົດຮຽນດ້ານນິຕິບັນຍັດແລະປົກຄອງດ້ວຍກົດໝາຍກັບສອງສະພາການາດາ, ເພື່ອເປັນການຊຸກຍູ້ການແລກປ່ຽນລະຫວ່າງປະຊາຊົນສອງຊາດ, ເສີມຂະຫຍາຍບົດບາດທີ່ີຕັ້ງໜ້າ ເພື່ອຮັດແໜ້ນສາຍພົວພັນແລະການຮ່ວມມື, ເພີ່ມທະວີຄວາມຮູ້ຈັກ, ຄວາມເຂົ້າໃຈແລະມິດຕະພາບລະຫວ່າງປະຊາຊົນສອງຊາດໃຫ້ດີຂຶ້ນກວ່າເກົ່າ.
ທ່ານ ຟູຣີ ໄດ້ສະແດງຄວາມເຫັນດີຕໍ່ການຕີລາຄາສາຍພົວພັນຈີນ-ການາດາຂອງທ່ານ ຫຼີເຄີ້ສຽງ, ແລະກ່າວວ່າ, ອົງການນິຕິບັນຍັດສອງປະເທດເພີ່ມທະວີການແລກປ່ຽນກັນນັ້ນ ມີຜົນດີຕໍ່ສອງຝ່າຍເພີ່ມຄວາມເຂົ້າໃຈກັນ, ບັນລຸຄວາມເປັນເອກະພາບກັນ ແລະເພີ່ມທະວີການຮ່ວມມືກັນ. ທ່ານຍັງສະແດງຄວາມເຊື່ອໝັ້ນວ່າ, ການຢ້ຽມຢາມຂອງທ່ານ ຫຼີເຄີ້ສຽງໃນຄັ້ງນີ້ ຈະເປັນໂອກາດສຳຄັນໃໝ່ໃຫ້ແກ່ການສືບຕໍ່ລົງເລິກການພົວພັນແລະການຮ່ວມມືລະຫວ່າງການາດາກັບຈີນ.