ຕອນເຊົ້າວັນທີ 25 ກັນຍານີ້, ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມສຸກເສີນ, ເພື່ອປຶກສາຫາລືບັນຫາການສູ້ຮົບທີ່ເກີດຂຶ້ນຢູ່ເມືອງອາເລັບໂປເຊິ່ງເປັນເມືອງສຳຄັນຢູ່ພາກເໜືອຂອງຊີຣີຫຼັງຮຸນແຮງຂຶ້ນໃນຫວ່າງມໍ່ໆມານີ້.
ກອງປະຊຸມສຸກເສີນເທື່ອນີ້ໄດ້ຈັດຂຶ້ນຢູ່ສຳນັກງານໃຫຍ່ອົງການສະຫະປະຊາຊາດທີ່ນິວຢອກໃນຕອນເຊົ້າວັນທີ 25 ກັນຍານີ້, ໂດຍທ່ານສະຕາຟານ ເດີ ມິສຕູຣາ ທູດພິເສດກ່ຽວກັບບັນຫາຊີຣີຂອງເລຂາທິການໃຫຍ່ອົງການສະຫະປະຊາຊາດໄດ້ແຈ້ງສະພາບການປະທະກັນທີ່ເກີດຂຶ້ນຢູ່ອາເລັບໂປຮຸນແຮງຂຶ້ນ, ແລະເຫັນວ່າການປະທະກັນທີ່ຮຸນແຮງນັ້ນຂຶ້ນຈະສົ່ງຜົນກະທົບທາງລົບຕໍ່ການຊ່ວຍເຫຼືອມະນຸດສະທຳຂອງອົງການສະຫະປະຊາຊາດແລະຊີວິດການເປັນຢູ່ຂອງປະຊາຊົນທ້ອງຖິ່ນ.
ແນວໃດກໍດີ, ໃນວັນທີ 24 ກັນຍານີ້, ທ່ານບັນກີມູນ, ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການຜ່ານໂຄສົກຂອງຕົນວ່າ, ມີຄວາມເປັນຫ່ວງຕໍ່ການປະທະກັນທີ່ເກີດຂຶ້ນຢູ່ອາເລັບໂປຢ່າງຮຸນແຮງ. ຫຼັງການຢຸດຍິງກັນທີ່ດຳເນີນມາເປັນເວລາ 7 ວັນທີ່ກອງທັບລັດຖະບານຊີຣີປະກາດນັ້ນໄດ້ສິ້ນສຸດລົງ, ໃນວັນທີ 19 ເດືອນກັນຍາປັດຈຸບັນອາເມລິກາແລະຣັດເຊຍຍັງບໍ່ສາມາດເປັນເອກະສັນກັນກ່ຽວກັບການແກ່ຍາວເວລາຢຸດຍິງ.