ວັນທີ 3 ຕຸລານີ້, ທ່ານກິມຢົງ ຜູ້ອຳນວຍການໃຫຍ່ທະນາຄານໂລກຮຽກຮ້ອງວ່າທົ່ວໂລກຄວນສົ່ງເສີມການຄ້າ,ເພີ່ມການລົງທຶນໃນດ້ານພື້ນຖານໂຄງລ່າງແລະຊັບພະຍາກອນມະນຸດເພື່ອຊຸກຍູ້ເສດຖະກິດໂລກໃຫ້ເຕີບໂຕຢ່າງແຂງແຮງ ແລະ ບັນລຸເປົ້າໝາຍລົບລ້າງຄວາມທຸກຍາກເຕັມທີເມື່ອຮອດ 2030.
ວັນດັ່ງກ່າວ,ຢູ່ສະຖາບັນບຣູຄິງສ ສະຫະລັດອາເມລິກາ, ທ່ານກິມຢົງໄດ້ກ່າວປາຖະກະຖາໃນພິທີເປີດກອງປະຊຸມປະຈຳປີລະດູໃບໄມ້ຫຼົ່ນຂອງອົງການກອງທຶນເງິນຕາສາກົນຫຼືIMFແລະທະນາຄານໂລກວ່າ: ເສດຖະກິດໂລກກຳລັງຜະເຊີນກັບຄວາມຫຍຸ້ງຍາກຢ່າງຫຼວງຫຼາຍ, ເສດຖະກິດຍັງເຕີບໂຕຢ່າງຊັກຊ້າ ເຊິ່ງໄດ້ນຳມາສິ່ງທ້າທາຍຢ່າງມະຫາສານຕໍ່ການລົບລ້າງຄວາມທຸກຍາກເຕັມທີແລະການສົ່ງເສີມການພັດທະນາຢ່າງຍຸດຕິທຳ.
ບົດລາຍງານສະບັບໜຶ່ງທີ່ທະນາຄານໂລກເປີດເຜີຍໃນຫວ່າງກ່ອນນີ້ບໍ່ດົນໄດ້ສະແດງໃຫ້ເຫັນວ່າ: ປັດຈຸບັນ, ທົ່ວໂລກມີປະຊາກອນທຸກຍາກເຕັມທີເຄິ່ງໜຶ່ງດຳລົງຊີວິດຢູ່ ພາກໃຕ້ຂອງຊາຮາລາທະວີບອາຟຣິກາເຊິ່ງເປັນເຂດແຄວ້ນທີ່ສິ່ງແວດລ້ອມບໍ່ດີ ແລະເກີດການປະທະກັນເລື້ອຍໆ ແລະເຂດແຄວ້ນເຫຼົ່ານີ້ກຳລັງຜະເຊີນກັບສິ່ງທ້າທາຍອັນຂ້ຽວຂາດໃນດ້ານການເຕີບໂຕແລະການລົບລ້າງຄວາມທຸກຍາກ.
ທ່ານກິມຢັງຢືນຢັນວ່າ: ບົດຮຽນຂອງຈີນແລະປະເທດອື່ນໆໄດ້ສະແດງໃຫ້ເຫັນວ່າ: ການສ້າງເສດຖະກິດແບບເປີດປະຕູແລະຊຸກຍູ້ການພັດທະນາ ການຄ້າບໍ່ພຽງແຕ່ຈະຊຸກຍູ້ເສດຖະກິດໃຫ້ເຕີບໂຕເທົ່ານັ້ນແຕ່ຍັງສາມາດຊ່ວຍປະຊາກອນຈຳນວນຫຼວງຫຼາຍຫຼຸດພົ້ນອອກຈາກຄວາມທຸກຍາກອີກດ້ວຍ.
 |
