ພິທີເປີດກິດຈະກຳສື່ຈີນ-ຣັດເຊຍເກັບກຳຂ່າວ "ເສັ້ນທາງສາຍໄໝ"ຢູ່ຈີນໂດຍກົມຖະແຫຼງຂ່າວ,ພິມຈຳໜ່າຍ,ວິທະຍຸ,ໂທລະພາບແລະຮູບເງົາແຫ່ງຊາດຈີນເປັນເຈົ້າພາບແລະວິທະຍຸສາກົນແຫ່ງປະເທດຈີນຫຼືCRI ແລະRossiya Segodnya ຣັດເຊຍຮ່ວມກັນປະຕິບັດນັ້ນໄດ້ຈັດຂຶ້ນຢູ່ສະຖານທູດຣັດເຊຍປະຈຳຈີນນະຄອນຫຼວງປັກກິ່ງໃນວັນທີ 11 ຕຸລານີ້.
ທ່ານຫວາງເກິ່ງນຽນ ຜູ້ອຳນວຍການໃຫຍ່ CRI ຢືນຢັນວ່າ ກິດຈະກຳສື່ຈີນ-ຣັດເຊຍເກັບກຳຂ່າວ "ເສັ້ນທາງສາຍໄໝ"ຢູ່ຈີນເປັນໂຄງການຮ່ວມມືລະຫວ່າງສື່ມວນຊົນສອງຝ່າຍເຊິ່ງເປັນອີກໂຄງການໃຫຍ່ທີ່ CRI ວາງແຜນແລະຈັດຕັ້ງປະຕິບັດພາຍໃນ ຂອບ "ປີແລກປ່ຽນຈີນ-ຣັດເຊຍ" ໂດຍຈະແນະນຳໃຫ້ຜູ້ຟັງ,ຜູ້ອ່ານ,ຜູ້ຊົມຂອງສອງປະເທດໄດ້ຮູ້ສະພາບການພັດທະນາເສດຖະກິດ-ສັງຄົມ,ປະຫວັດສາດ,ວັດທະນະທຳແລະຮີດຄອງປະເພນີຂອງປະຊາຊົນຢູ່ຕົວເມືອງສຳຄັນລຽບຕາມແລວທາງເສດຖະກິດເສັ້ນທາງສາຍໄໝ ທັງຈະລາຍງານຫຼາຍແງ່ມຸມກ່ຽວກັບການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ເຊື່ອມຕໍ່ກັບການກໍ່ສ້າງສະຫະພັນເສດຖະກິດເອີຣົບອາຊີຢ່າງຮອບດ້ານ.
ໃນພິທີດັ່ງກ່າວ, ທ່ານແອນດຣີ ເດນີໂຊຟ ເອກອັກຄະລັດຖະທູດຣັດເຊຍປະຈຳຈີນແລະທ່ານຫວາງເກິ່ງນຽນ ຜູ້ອຳນວຍການໃຫຍ່ CRI ຍັງໄດ້ມອບລາງວັນຜົນງານດີເດັ່ນເພື່ອມິດຕະພາບຈີນ-ຣັດເຊຍໃຫ້ທ່ານນາງຟ້ານປິ່ງປິ່ງ ພະນັກງານປະຈຳພະແນກພາສາຣັດເຊຍຂອງ CRI ເພື່ອຍ້ອງຍໍຊົມເຊີຍຕໍ່ການປະກອບສ່ວນອັນພົ້ນເດັ່ນຂອງທ່ານໃນການສົ່ງເສີມການຮ່ວມມືລະຫວ່າງສື່ມວນຊົນແລະປະຊາຊົນຈີນ-ຣັດເຊຍຕະຫຼອດໄລຍະເກືອບ 40 ປີຜ່ານມາ.
 |
