ທ່ານສີຈິ້ນຜີງພົບປະກັບປະທານາທິບໍດີບັງກະລາເດັດ

ວັນທີ 14 ຕຸລານີ້, ທ່ານສີຈິ້ນຜີງ ປະທານປະເທດຈີນໄດ້ພົບປະກັບທ່ານອັບດຸລາ ຮາມີດ, ປະທານາທິບໍດີບັງກະລາເດັດຢູ່ນະຄອນຫຼວງດາກາປະເທດບັງກະລາເດັດ.

ທ່ານສີຈິ້ນຜີງຊີ້ໃຫ້ເຫັນວ່າ, ບັງກະລາເດັດແມ່ນປະເທດສຳຄັນຂອງອາຊີໃຕ້ແລະເຂດມະຫາສະໝຸດອິນເດຍ, ກໍແມ່ນປະເທດທີ່ມີປະຊາກອນຫຼາຍໃນໂລກ. ພາຍຫຼັງສອງປະເທດສ້າງສາຍພົວພັນທາງການທູດເປັນເວລາ 41 ປີມານີ້, ການພົວພັນລະຫວ່າງສອງປະເທດຈີນກັບບັງກະລາເດັດໄດ້ຂະຫຍາຍຕົວເປັນຢ່າງດີບົນພື້ນຖານຫຼັກ 5 ປະການຢູ່ຮ່ວມກັນໂດຍສັນຕິ, ການແລກປ່ຽນແລະຮ່ວມມືໃນຂົງເຂດຕ່າງໆໄດ້ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນຂອງສອງປະເທດ. ສອງຝ່າຍເຫັນດີປັບປຸງກົນໄກຮ່ວມມືໃຈຂົງເຂດຕ່າງໆໃຫ້ສົມບູນຂຶ້ນ, ຕັ້ງໜ້າປະຕິບັດໂຄງການຮ່ວມມືໃຫຍ່ໃນຂົງເຂດສຳຄັນ, ຮ່ວມກັນຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ສ້າງຄວາມຜາສຸກໃຫ້ແກ່ປະຊາຊົນສອງປະເທດ, ແລະປະກອບສ່ວນເຂົ້າການເຊື່ອມຈອດກັນ, ການພັດທະນາແລະຄວາມຈະເລີນຮຸ່ນເຮືອງຂອງພາກພື້ນແຫ່ງນີ້.

ທ່ານຮາມີດ ກ່າວວ່າ, ການຢ້ຽມຢາມເທື່ອນີ້ຂອງປະທານສີຈິ້ນຜີງໄດ້ຍົກສາຍພົວພັນລະຫວ່າງສອງປະເທດໃຫ້ຂຶ້ນສູ່ລະດັບໃໝ່, ຈີນໄດ້ກາຍເປັນຄູ່ຮ່ວມມືຍຸດທະສາດປະເທດທຳອິດຂອງບັງກະລາເດັດ. ສອງຝ່າຍມີກຳລັງບົ່ມຊ້ອນຢ່າງໃຫຍ່ຫຼວງໃນການຮ່ວມມືໃນຂົງເຂດການຄ້າ, ການລົງທຶນ, ກະສິກຳ, ພະລັງງານແລະການກໍ່ສ້າງພື້ນຖານໂຄງລ່າງເປັນຕົ້ນ. ບັງກະລາເດັດຍິນດີສືບຕໍ່ສະໜັບສະໜູນເຊິ່ງກັນແລະກັນກັບຈີນໃນບັນຫາຜົນປະໂຫຍດໃຈກາງຂອງສອງຝ່າຍ, ຍິນດີກາຍເປັນຄູ່ຮ່ວມມືພັດທະນາທີ່ໄວ້ເນື້ອເຊື່ອໃຈໄດ້ຂອງຈີນ, ແລະເພີ່ມທະວີການປະສານສົມທົບລະຫວ່າງສອງປະເທດໃນບັນຫາພາກພື້ນແລະສາກົນທີ່ສຳຄັນ.