ໃນພິທີຖະແຫຼງຂ່າວຂອງກະຊວງການຄ້າທີ່ຈັດຂຶ້ນໃນວັນທີ 18 ຕຸລານີ້, ທ່ານເສີນຕ່ານຢາງ ໂຄສົກກະຊວງການຄ້າຈີນ ກ່າວວ່າ: ຈີນແລະຟິລິບປິນຈະເພີ່ມທະວີການເຊື່ອມຕໍ່ຍຸດທະສາດພັດທະນາເສດຖະກິດການຄ້າ ລວມທັງປຶກສາຫາລືຢ່າງເລິກເຊິ່ງ ກ່ຽວກັບຊ່ອງທາງເປີດກວ້າງການຄ້າສອງຝ່າຍ, ສົ່ງເສີມແລະຊີ້ນຳວິສາຫະກິດໃນການເປີດກວ້າງການລົງທຶນຢູ່ຟິລິບປິນ ແລະອື່ນໆ ເຊິ່ງເນື້ອໃນເຫຼົ່ານີ້ລ້ວນແຕ່ຕິດແທດຕົວຈິງ ເປັນຕົ້ນແມ່ນເປີດກວ້າງການນຳເຂົ້າໝາກໄມ້ເຂດຮ້ອນຈາກຟິລິບປິນ.
ທ່ານເສີນຕ່ານຢາງ ກ່າວຕື່ມວ່າ: ຈີນຫວັງວ່າ ທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນເດີນທາງຢ້ຽມຢາມຈີນເທື່ອນີ້ ຈະເປັນການປັບປຸງແລະເພີ່ມທະວີການພົວພັນເສດຖະກິດການຄ້າລະຫວ່າງສອງປະເທດຕື່ມອີກ ແລະຍົກລະດັບການຮ່ວມມືລະຫວ່າງສອງຝ່າຍທັງເສີມຂະຫຍາຍກວ້າງອອກຢ່າງບໍ່ຢຸດຢັ້ງ.
ໃນຊຸມປີຜ່ານມາ, ການພົວພັນເສດຖະກິດການຄ້າລະຫວ່າງຈີນ-ຟິລິບປິນໄດ້ພັດທະນາຢ່າງແໜ້ນແຟ້ນ ໂດຍທາງການຈີນເປີດເຜີຍວ່າ: ການຄ້າລະຫວ່າງສອງຝ່າຍແຕ່ເດືອນມັງກອນຫາເດືອນກັນຍາປີນີ້ ໄດ້ເພີ່ມຂຶ້ນ 10,6% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະດີກວ່າສະພາບການຄ້າກັບຕ່າງປະເທດໂດຍລວມຂອງຈີນໃນໄລຍະດຽວກັນ ທັງດີກວ່າສະພາບນຳເຂົ້າ-ສົ່ງອອກລະຫວ່າງຈີນ-ອາຊຽນເຊັ່ນກັນ. ໃນນັ້ນ, ຈີນສົ່ງອອກໄປຟິລິບປິນເພີ່ມຂຶ້ນ 22,9% ແລະນຳເຂົ້າຫຼຸດລົງ 5,9% ເມື່ອທຽບໃສ່ໄລຍະດຽວກັນຂອງປີຜ່ານມາ.
