ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ ປະທານປະເທດຈີນ, ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນໄດ້ເດີນທາງເຖິງນະຄອນຫຼວງປັກກິ່ງ ສປ ຈີນໃນຄືນວັນທີ 18 ຕຸລານີ້ ເຊິ່ງເປັນການເລີ່ມຕົ້ນ ຢ້ຽມຢາມທາງລັດຖະກິດຈີນເປັນເວລາ 4 ວັນ.
ຈີນເປັນປະເທດນອກອາຊຽນປະເທດທຳອິດທີ່ທ່ານດູເຕີເຕຢ້ຽມຢາມໂດຍໃນວັນທີ 18 ຕຸລານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ຖະແຫຼງຕໍ່ສື່ມວນຊົນວ່າ: ນີ້ແມ່ນການຢ້ຽມຢາມຄັ້ງປະຫວັດສາດ ເຊິ່ງຈະເປັນຈຸດເລີ່ມຕົ້ນໃໝ່ຂອງສາຍພົວພັນຈີນ-ຟີລິບປິນ ແລະເຊື່ອວ່າ ການຢ້ຽມຢາມຂອງທ່ານປະທານາທິບໍດີດູເຕີເຕຈະປະສົບຜົນສຳເລັດ ເຊິ່ງຜົນສຳເລັດຂອງການຢ້ຽມຢາມຄັ້ງນີ້ບໍ່ພຽງແຕ່ຈະເຮັດໃຫ້ສາຍພົວພັນຈີນ-ຟີລິບປິນກັບຄືນສູ່ປົກກະຕິເທົ່ານັ້ນ, ແຕ່ຍັງຈະສ້າງອະນາຄົດໃໝ່ເພື່ອການຮ່ວມມືແບບຕ່າງຝ່າຍມີຜົນປະໂຫຍດຂອງສອງປະເທດໃນຂົງເຂດຕ່າງໆ.
ທ່ານຫວາງຢີ້ຢືນຢັນວ່າ: ຫຼັງທ່ານປະທານາທິບໍດີດູເຕີເຕຂຶ້ນດຳລົງຕຳແໜ່ງແລ້ວ,ທ່ານໄດ້ເລືອກເສັ້ນທາງປັບປຸງມິດຕະພາບກັບຈີນຄືນໃໝ່ແລະຍິນດີກັບຄືນສູ່ການເຈລະຈາແລະຮ່ວມມືຄືນໃໝ່ ອັນໄດ້ສ່ອງແສງໃຫ້ເຫັນເຖິງຄວາມປາຖະໜາຂອງປະຊາຊົນຟີລິບປິນ ແລະສອດຄ່ອງກັບຜົນປະໂຫຍດແຫ່ງຊາດຟີລິບປິນທັງຖືກຕ້ອງ ຕາມຂະບວນວິວັດແຫ່ງການພັດທະນາທາງປະຫວັດສາດເຊິ່ງບໍ່ວ່າຜູ້ໃດຫຼືອິດທິກຳລັງໃດກໍຕາມກໍຈະບໍ່ອາດສາມາດສະກັດກັ້ນໄດ້.