ພິທີເຊັນສັນຍາຂອບການສ້າງສາຍພົວພັນຮ່ວມມືຍຸດທະສາດໂຄສະນາຕໍ່ພາຍນອກລະຫວ່າງວິທະຍຸສາກົນແຫ່ງປະເທດຈີນ(CRI) ແລະ ຄະນະໂຄສະນາອົບຮົມແຂວງຝູຈ້ຽນ ສປ ຈີນ ໄດ້ຈັດຂຶ້ນຢູ່ເມືອງຝູໂຈ່ວ ເທດສະບານແຂວງຝູຈ້ຽນໃນວັນທີ 18 ຕຸລານີ້ ໂດຍທ່ານຫວາງເກິ່ງໜຽນ ຜູ້ອຳນວຍການໃຫຍ່ CRI ແລະ ທ່ານກາວສຽງ ຫົວໜ້າຄະນະໂຄສະນາອົບຮົມຄະນະພັກແຂວງດັ່ງກ່າວ ເຂົ້າຮ່ວມເປັນສັກຂີພິຍານໃນພິທີດັ່ງກ່າວ.
ກ່ອນການລົງນາມ, ທ່ານຫວາງເກິ່ງໜຽນ ກ່າວໃນໂອກາດພົບປະກັບທ່ານກາວສຽງ ໂດຍຢືນຢັນວ່າ: ໃນກົນໄກແລະເວທີໃໝ່ແຫ່ງການຮ່ວມມືຍຸດທະສາດການໂຄສະນາຕໍ່ພາຍນອກ, CRI ແລະ ຄະນະໂຄສະນາອົບຮົມແຂວງຝູຈ້ຽນ ຈະພົວພັນກັນຢ່າງແໜ້ນແຟ້ນ ແລະ ຮ່ວມມືກັນຢ່າງແທ້ຈິງ ໂດຍການນຳໃຊ້ພາຫະນະການໂຄສະນາທີ່ມີ 65 ພາສາ, ສະຖານີວິທະຍຸຮ່ວມມືການກະຈາຍສຽງອອກອາກາດຢູ່ທ້ອງຖິ່ນ 130 ກວ່າແຫ່ງ, ສື່ຕ່າງປະເທດຮ່ວມມື 100 ກວ່າແຫ່ງ ແລະອື່ນໆ ເພື່ອໂຄສະນາແຂວງຝູຈ້ຽນຕໍ່ໂລກໃຫ້ມີຄຸນນະພາບ ໂດຍພະຍາຍາມໂຄສະນາການພັດທະນາສັງຄົມ, ເສດຖະກິດ ແລະ ວັດທະນະທຳຂອງແຂວງຝູຈ້ຽນໄປສູ່ທົ່ວໂລກ ແລະສ້າງບັນຍາກາດຄວາມຮັບຮູ້ທີ່ດີເພື່ອການພັດທະນາແລະຄວາມຈະເລີນຂອງແຂວງຝູຈ້ຽນໃນສາກົນ.