ກອງປະຊຸມຄົບຄະນະເທື່ອທີ 6 ສະໄໝທີ 18 ຂອງພັກກອມມູນິດຈີນໄດ້ໄຂຂຶ້ນຢູ່ປັກກິ່ງໃນວັນທີ 24 ຕຸລານີ້ໂດຍຈະສຶກສາຄົ້ນຄວ້າບັນຫາສຳຄັນກ່ຽວກັບການຄຸ້ມຄອງພັກຢ່າງເຂັ້ມງວດຮອບດ້ານ ແລະສ້າງກົດຈຳນວນໜຶ່ງກ່ຽວກັບຊີວິດການເມືອງພາຍໃນພັກພາຍໃຕ້ສະຖານະການໃໝ່ ທັງປັບປຸງກົດລະບຽບວ່າດ້ວຍການຕິດຕາມພາຍໃນພັກຂອງພັກກອມມູນິດຈີນສະບັບທົດລອງປະຕິບັດ.
ຊ່ຽວຊານເຫັນວ່າ, ເນື້ອໃນທີ່ຈະຫາລືໃນກອງປະຊຸມຄັ້ງນີ້ພ້ອມດ້ວຍເອກະສານທີ່ຈະກຳນົດອອກໃນໄວໆນີ້ຈະເປັນການສະຫຼຸບບົດຮຽນແລະປະສົບການໃນການຄຸ້ມຄອງພັກຢ່າງເຂັ້ມງວດຮອບດ້ານຂອງພັກກອມມູນິດຈີນນັບແຕ່ກອງປະຊຸມໃຫຍ່ຄັ້ງທີ 18 ຂອງພັກເປັນຕົ້ນມາ ທັງປັບປຸງຜົນປະຕິບັດຕົວຈິງໃນການຕ້ານການສໍ້ລາດບັງຫຼວງຈາກດ້ານລະບຽບການເພື່ອເປັນບ່ອນອີງແລະການຊີ້ນຳໃຫ້ແກ່ການຄຸ້ມຄອງພັກຢ່າງເຂັ້ມງວດໃນໄລຍະຕໍ່ໄປ.
ທ່ານຈ່ວງເຕີສຸຍ ຮອງຫົວໜ້າສູນຄົນຄວ້າການກໍ່ສ້າງການປົກຄອງຢ່າງປອດໃສຂາວສະອາດຂອງມະຫາວິທະຍາໄລປັກກິ່ງຢືນຢັນວ່າ: ກອງປະຊຸມຄົບຄະນະເທື່ອທີ 6 ສະໄໝທີ 18 ຂອງພັກກອມມູນິດຈີນຈະສຸມໃສ່ການຄຸ້ມຄອງພັກຢ່າງເຂັ້ມງວດຮອບດ້ານອີກເທື່ອໃໝ່ນັ້ນເປັນຄວາມຮຽກຮ້ອງຕ້ອງການຂອງຍຸກສະໄໝທີ່ຈີນບັນລຸການປະຕິຮູບແລະການພັດທະນາພາຍໃຕ້ສະຖານະການໃໝ່. ກອງປະຊຸມຄັ້ງນີ້ຍັງຈະເຕົ້າໂຮມຄວາມເຫັນທີ່ເປັນເອກະພາບກັນຂອງທົ່ວພັກແລະທົ່ວສັງຄົມ, ຊຸກຍູ້ການກໍ່ສ້າງແລະພັດທະນາທົ່ວປະເທດຊາດໃຫ້ໄດ້ຮັບປະສິດທິຜົນຫຼາຍກວ່າເກົ່າໂດຍສະເພາະຊຸກຍູ້ລະບົບຄຸ້ມຄອງປະເທດແລະຄວາມສາມາດການຄຸ້ມຄອງໃຫ້ຫັນເປັນທັນສະໄໝຫຼາຍກວ່າເກົ່າ.