ເນື່ອງໃນໂອກາດກອງກຳລັງອາສາສະໝັກປະຊາຊົນຈີນເດີນທາງສູ່ ສປປ ເກົາຫຼີ ເພື່ອສະໜັບສະໜູນປະເທດດັ່ງກ່າວສູ້ຮົບຕ້ານການຮຸກຮານຂອງອາເມລິກາຄົບຮອບ 66 ປີ, ຈີນ ແລະ ສປປ ເກົາຫຼີໄດ້ຮ່ວມຈັດກິດຈະກຳລະນຶກຂຶ້ນຢູ່ຫໍສູງມິດຕະພາບ (Sino-Korean Friendship Tower) ນະຄອນຫຼວງພຽງຢາງໃນວັນທີ 25 ຕຸລານີ້ ເພື່ອລະນຶກແລະອາໄລຕໍ່ຜູ້ເສຍສະຫຼະຊີວິດເພື່ອການປະຕິວັດໃນສົງຄາມ ສປປ ເກົາຫຼີ.
ທ່ານຮົງເຊນອົກ ເລຂາທິການໃຫຍ່ຄະນະປະຈຳສະພາປະຊາຊົນສູງສຸດ, ທ່ານຄັງຮາກຸກ ລັດຖະມົນຕີກະຊວງສາທາລະນະສຸກ ສປປ ເກົາຫຼີ ທັງເປັນປະທານສະມາຄົມມິດຕະພາບ ສປປ ເກົາຫຼີ-ຈີນ, ຜູ້ນຳພັກ-ລັດແລະກອງທັບ ສປປ ເກົາຫຼີ ພ້ອມດ້ວຍທ່ານຫຼິວເຈີ້ນໝິນ ຮອງລັດຖະມົນຕີກະຊວງການຕ່າງປະເທດຈີນ ທີ່ພວມເຂົ້າຮ່ວມກອງປະຊຸມປະສົມຊາຍແດນຈີນ-ສປປ ເກົາຫຼີຢູ່ ສປປ ເກົາຫຼີ, ທ່ານຫຼີຈິ້ນຈິ່ນ ເອກອັກຄະລັດຖະທູດຈີນປະຈຳ ສປປ ເກົາຫຼີ ໄດ້ເຂົ້າຮ່ວມພິທີດັ່ງກ່າວ.
ມື້ດຽວກັນ, ຜູ້ຕາງໜ້າຊາວເມືອງພຽງຢາງ, ອົງການຈີນປະຈຳ ສປປ ເກົາຫຼີ, ຊາວ ສປປ ເກົາຫຼີເຊື້ອສາຍຈີນ ແລະ ນັກສຶກສາ ລວມ 300 ກວ່າຄົນໄດ້ວາງດອກໄມ້ສະແດງຄວາມຮູ້ບຸນຄຸນຕໍ່ກອງກຳລັງອາສາສະໝັກປະຊາຊົນຈີນຜູ້ເສຍສະຫຼະຊີວິດຢູ່ຫໍສູງມິດຕະພາບ. ຂະນະທີ່ຄະນະຜູ້ແທນຫຼາຍຄະນະ ເປັນຕົ້ນຄະນະຜູ້ແທນໜ່ວຍງານອະນາໄມສິ່ງກໍ່ສ້າງລະນຶກກອງກຳລັງອາສາສະໝັກປະຊາຊົນຈີນຜູ້ເສຍສະຫຼະຊີວິດ ແລະ ຄະນະອະນາໄມສິ່ງກໍ່ສ້າງລະນຶກ ກອງກຳລັງອາສາສະໝັກປະຊາຊົນຈີນຜູ້ເສຍສະຫຼະຊີວິດແຂວງຈີຫຼິນ ສປ ຈີນ ກໍໄດ້ເຂົ້າຮ່ວມພິທີດັ່ງກ່າວ.
