ສູນຄົ້ນຄວ້າລັດທິມາກສ໌ຂອງສະຖາບັນວິທະຍາສາດ-ສັງຄົມແຫ່ງຊາດຈີນພ້ອມດ້ວຍສະຖາບັນວິທະຍາສາດ-ສັງຄົມແຫ່ງຊາດລາວແລະຫວຽດນາມໄດ້ຮ່ວມ ເວທີປຶກສາຫາລືສັງຄົມນິຍົມສາກົນຄັ້ງທີ 4 ຢູ່ເມືອງກຸ້ຍຫຼິນ ເຂດກວາງຊີ ສປ ຈີນໃນວັນທີ 2-3 ພະຈິກນີ້ ໂດຍຜູ້ຊ່ຽວຊານແລະນັກວິຊາການທັງ 3 ປະເທດໄດ້ແລກປ່ຽນແລະປຶກສາຫາລືປິ່ນອ້ອມຫົວຂໍ້ "ທົບທວນແລະຈ້ອງມອງການປະຕິຮູບຂອງສັງຄົມນິຍົມ".
ໂອກາດດັ່ງກ່າວ, ທ່ານ ເຟືອງສີ ລາວຟຸ້ງ ຫົວໜ້າສູນຄົ້ນຄວ້າເສດຖະກິດຈາກສະຖາບັນວິທະຍາສາດ-ສັງຄົມແຫ່ງຊາດລາວກ່າວວ່າ: "ປັດຈຸບັນປະຊາຊົນທຸກຍາກກວມ 30% ໃນທົ່ວປະເທດຕົນແຕ່ແນວໃດກໍດີພັກ-ລັດຖະບານລາວກໍໄດ້ສຸມໃສ່ປະຕິບັດນະໂຍບາຍລົບລ້າງຄວາມທຸກຍາກໂດຍການພັດທະນາເຂດຊົນນະບົດຢ່າງຮອບດ້ານ. ຂະນະດຽວກັນກໍຫວັງຖອດຖອນບົດຮຽນການຫຼຸດຜ່ອນຄວາມທຸກຍາກກໍຄືພັດທະນາເສດຖະກິດນຳຈີນ ເພື່ອເພີ່ມທະວີການຮ່ວມມືນຳກັນຕື່ມອີກ."
ທ່ານ ເຟືອງສີ ລາວຟຸ້ງ ກ່າວຕື່ມວ່າ: "ປະເທດຕົນຕັ້ງເປົ້າໝາຍຫຼຸດພົ້ນອອກຈາກປະເທດດ້ອຍພັດທະນາໃນປີ 2020 ແລະພະຍາຍາມຫຼຸດອັດຕາປະຊາຊົນ ທຸກຍາກລົງໃຫ້ຢູ່ໃນລະດັບ 10%." ຂະນະດຽວກັນ, ພັກລັດປະເທດຕົນຍຶດໝັ້ນພັດທະນາໄປຕາມເສັ້ນທາງສັງຄົມນິຍົມຢ່າງສະເໝີຕົ້ນສະເໝີປາຍ, ຂະນະທີ່ປັດຈຸບັນພວມສ້າງລະບອບປະຊາທິປະໄຕແຕ່ຂັ້ນສູນກາງຫາທ້ອງຖິ່ນຕາມແນວທາງຂອງພັກ. ແນວໃດກໍດີ, ຫວັງວ່າຈະໄດ້ຮັບການຊ່ວຍເຫຼືອແລະສະໜັບສະໜູນການພັດທະນາເຂດຊົນນະບົດກໍຄືການຫຼຸດຜ່ອນຄວາມທຸກຍາກຈາກຈີນ.
 |
