ສັບປະດາກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີປາຊີຟິກ ຫຼື ອາເປັກ 2016 ໄດ້ເລີ່ມເປີດສາກຢູ່ນະຄອນລີມາ ປະເທດເປຣູໃນວັນທີ 14 ພະຈິກນີ້.
ຫົວຂໍ້ກອງປະຊຸມໃນປີນີ້ເນັ້ນ "ການເຕີບໂຕຢ່າງມີຄຸນນະພາບສູງແລະການພັດທະນາຂອງມວນມະນຸດ" ໂດຍຜູ້ນຳ ແລະ ຜູ້ແທນຂອງກຸ່ມເສດຖະກິດຕ່າງໆ ຈະແລກປ່ຽນຄຳຄິດຄຳເຫັນຢ່າງເລິກເຊິ່ງກ່ຽວກັບບັນຫາຕ່າງໆ ເປັນຕົ້ນ ການເຊື່ອມໂຍງເສດຖະກິດພາກພື້ນ, ເຂດເສດຖະກິດເສລີອາຊີປາຊີຟິກ, ການເຊື່ອມຈອດ ແລະການຮ່ວມມືໃນຂົງເຂດບໍລິການ.
ທ່ານເມີເຊເດັສ ອາຣາວ ຮອງປະທານາທິບໍດີຜູ້ທີ 2 ປະເທດເປຣູ ກ່າວວ່າ: ກອງປະຊຸມເທື່ອນີ້ພໍດີເປັນໂອກາດດີໃຫ້ແກ່ການປຶກສາຫາລືການພັດທະນາແບບຍືນຍົງ ໂດຍມີວາລະຢ່າງກວ້າງຂວາງ ລວມທັງຄວາມປອດໄພດ້ານສະບຽງອາຫານ, ຊັບພະຍາກອນມະນຸດ ແລະ ການເຊື່ອມໂຍງ ເປັນຕົ້ນ. ນອກນີ້, ພວກເຮົາຍັງຈັດເອົາບັນຫາການເຮັດແນວໃດເພື່ອໃຫ້ວິສາຫະກິດຂະໜາດກາງແລະນ້ອຍເຊື່ອມໂຍງຕ່ອງໂສ້ຄຸນຄ່າອຸດສາຫະກຳທົ່ວໂລກ ເຂົ້າໃນວາລະປະຊຸມອີກ.
ໃນສັບປະດາກອງປະຊຸມເທື່ອນີ້ ຈະຈັດກອງປະຊຸມຕ່າງໆ ເຊັ່ນ ກອງປະຊຸມສະພາມົນຕີທີ່ປຶກສາອຸດສາຫະກຳການຄ້າ, ກອງປະຊຸມລະດັບລັດຖະມົນຕີ, ກອງປະຊຸມສຸດຍອດຜູ້ນຳອຸດສາຫະກຳການຄ້າ ແລະ ກອງປະຊຸມບໍ່ເປັນທາງການຜູ້ນຳອົງການອາເປັກ.