ກອງປະຊຸມປຶກສາຫາລືລະດັບສູງກ່ຽວກັບການຕ່າງປະເທດແລະການປ້ອງກັນປະເທດຈີນ-ມຽນມາເທື່ອທຳອິດໄດ້ຈັດຂຶ້ນໃນວັນທີ 25 ພະຈິກນີ້ຢູ່ນະຄອນຫຼວງເນປີດໍປະເທດມຽນມາໂດຍການເປັນປະທານຮ່ວມຂອງທ່ານຫຼິວເຈິ້ນມິນ ຮອງລັດຖະມົນຕີການຕ່າງປະເທດຈີນ, ທ່ານສູເຟິນລິນ ຮອງຫົວໜ້າກົມໃຫຍ່ເສນາທິການປະສົມຄະນະກຳມະການການທະຫານຈີນແລະທ່ານຄົວທິນ ລັດຖະມົນຕີກະຊວງການຕ່າງປະເທດມຽນມາ, ທ່ານທຸນທຸນນອງ ຫົວໜ້າກົມສູ້ຮົບພິເສດທີ 1 ຂອງກອງທັບປ້ອງກັນຊາດມຽນມາ.
ສອງຝ່າຍເປັນເອກະພາບກັນເຫັນວ່າ: ຈີນ-ມຽນມາເປັນເພື່ອບ້ານໃກ້ຄຽງທີ່ດີແລະມີພູຜາແມ່ນ້ຳຕິດຈອດກັນ, ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຂະຫຍາຍຕົວໄປດ້ວຍດີ ແລະສອງຝ່າຍໄດ້ປຶກສາຫາລືບົນຈິດໃຈມິດຕະພາບໃນຫົວຂໍ້ຕ່າງໆກ່ຽວກັບຄວາມໝັ້ນຄົງແລະການພັດທະນາຂອງເຂດຊາຍແດນເປັນຕົ້ນ ການຮັກສາສັນຕິພາບແລະສະຖຽນລະພາບຂອງເຂດຊາຍແດນຈີນ-ມຽນມາ,ຈີນໃຫ້ການຊ່ວຍເຫຼືອທີ່ມີລັກສະນະສ້າງສັນແກ່ຂະບວນການສັນຕິພາບພາຍໃນປະເທດມຽນມາ, ຮ່ວມກັນຕໍ່ຕ້ານການເຂົ້າອອກເມືອງຢ່າງຜິດກົດໝາຍຢູ່ເຂດຊາຍແດນ ແລະອື່ນໆ.
ສອງຝ່າຍລ້ວນແຕ່ໃຫ້ຄວາມສຳຄັນສູງຕໍ່ການປົກຄອງຄວາມໝັ້ນຄົງຕາມກົດໝາຍ, ສັນຕິພາບແລະສະຖຽນລະພາບຂອງເຂດຊາຍແດນລະຫວ່າງສອງປະເທດ. ຈີນຊຸກຍູ້ໃຫ້ຝ່າຍຕ່າງໆພະຍາຍາມຮ່ວມກັນເພື່ອລະງັບສະຖານະການທີ່ເຄັ່ງຕຶງຢູ່ເຂດພາກເໜືອມຽນມາໃນປັດຈຸບັນ ແລະເຮັດໃຫ້ເຂດຊາຍແດນຈີນ-ມຽນມາຟື້ນຟູກັບຄືນສູ່ສະຖຽນລະພາບຄືເກົ່າ.
