ຕາມຂ່າວCRI: ຕອນຮຸ່ງເຊົ້າວັນທີ 26 ພະຈິກນີ້, ລັດຖະບານກູບາປະກາດວ່າຈະໄວ້ອາໄລລະດັບຊາດເປັນເວລາ 9 ວັນ, ເພື່ອໄວ້ອາໄລຕໍ່ ທ່ານຟີແດນ ກາສ, ຜູ້ນຳການປະຕິບັດກູປາທີ່ໄດ້ເຖິງແກ່ມໍລະນະກຳ.
ໜັງສືພິມ "ກຼາມາ" ສຽງຂອງສູນກາງພັກກອມມູນິດກູບາລາຍງານວ່າ, ລັດຖະບານໄດ້ປະກາດວ່າໃນວັນທີ 28, ວັນທີ 29 ພະຈິກນີ້, ຢູ່ນະຄອນຫຼວງລາຮາວານ, ປະຊາຊົນສາມາດໄວ້ອາໄລຕໍ່ທ່ານຟີແດນ ກາສໂຕຼຢູ່ອະນຸສາວະລີໂຈເຊ ມາຕີແລະໃນເວລາ 19 ໂມງຂອງວັນທີ 29 ພະຈິກນີ້, ຢູ່ນະຄອນຫຼວງລາຮາວານຍັງຈະຈັດງານໂຮມຊຸມນຸມເທື່ອໜຶ່ງເພື່ອສະແດງຄວາມເຄົາລົບນັບຖືຕໍ່ທ່ານຟີແດນ ກາສໂຕຼ.
ຄະນະກຳມະການວຽກງານແຫ່ງລັດກູບາຍັງໄດ້ປະກາດວ່າ, ນັບແຕ່ເວລາ 6 ໂມງຂອງວັນທີ 26 ພະຈິກນີ້ຫາຕອນທ່ຽງວັນທີ 4 ທັນວາເປັນເວລາໄວ້ອາໄລລະດັບຊາດຂອງກູບາ, ໃນໄລຍະດັ່ງກ່າວນັ້ນຈະງົດກິດຈະກຳສິລະປະແລະການບັນເທີງທຸກປະເພດແລະຊັກທຸງຊາດລົງເຄິ່ງເສົາ.
ທ່ານຟີແດນ ກາສໂຕຼໄດ້ເຖິງແກ່ມໍລະນະກຳໃນເວລາ 22 ໂມງ 29 ນາທີຕອນຂອງວັນທີ 25 ພະຈິກນີ້, ລວມອາຍຸ 90 ປີ.
ທ່ານຟີແດນ ກາສໂຕຼເກີດເມື່ອວັນທີ 13 ເດືອນສິງຫາປີ 1926. ໃນເດືອນມັງກອນປີ 1959, ທ່ານໄດ້ນຳພາກອງລຸກຮືໂຄນລົ້ມອຳນາດການປົກຄອງຜະເດັດການຂອງທ່ານບາຕີສຕາສ້າງຕັ້ງລັດຖະບານປະຕິວັດ, ຫຼັງຈາກນັ້ນ, ທ່ານໄດ້ດຳລົງຕຳແໜ່ງເປັນນາຍົກລັດຖະມົນຕີຂອງລັດຖະບານແລະຜູ້ບັນຊາການໃຫຍ່ກອງທັບ. ປີ 1976, ທ່ານຟີແດນ ກາສໂຕຼໄດ້ດຳລົງຕຳແໜ່ງເປັນປະທານຄະນະກຳມະການວຽກງານແຫ່ງລັດ. ຫຼັງທ່ານໄດ້ມອບອຳນາດໃຫ້ທ່ານຣາອູນ ກາສໂຕຼຍ້ອນເຈັບເປັນເມື່ອປີ 2006 ເປັນຕົ້ນມາ, ທ່ານກໍ່ບໍ່ຄ່ອຍປາກົດໂຕ.