ຢູ່ບ້ານສົບຕຸດເມືອງນ້ຳທາແຂວງຫຼວງນ້ຳທາ ສປປ ລາວມີສວນສາທິດຢາງພາລາແຫ່ງໜຶ່ງເຊິ່ງກ່ອນໜ້ານີ້ 10 ປີປະຊາຊົນບ້ານນີ້ປູກຝິ່ນຢ່າງຫຼວງຫຼາຍ, ແຕ່ປັດຈຸບັນເຂົາເຈົ້າມີຊີວິດການເປັນຢູ່ດີຂຶ້ນແລະບ້ານກໍໄດ້ຮັບການປ່ຽນແປງກ້າວໜ້າຂຶ້ນຫຼັງບໍລິສັດລົງທຶນຢູນຊ້ຽງທີ່ຂຶ້ນກັບກຸ່ມບໍລິສັດບຸກເບີກກະສິກຳແຂວງຢຸນນານ ສປ ຈີນເຂົ້າມາລົງທຶນແລະສົ່ງເສີມການປູກຢາງພາລາທັງພັດທະນາພື້ນຖານໂຄງລ່າງແລະກໍ່ສ້າງໂຮງຮຽນ.
ພາຍຫຼັງສຸມໃສ່ການພັດທະນາມາເປັນເວລາຫຼາຍປີໂດຍບໍລິສັດຢູນຊ້ຽງໄດ້ປູກຕົ້ນຢາງພາລາ 3 ແສນກວ່າຕົ້ນຢູ່ 4 ແຂວງທາງພາກເໜືອລາວຄື: ແຂວງຫຼວງນ້ຳທາ, ໄຊຍະບູລີ, ບໍ່ແກ້ວແລະຫຼວງພະບາງ ເພື່ອປ່ຽນແທນສວນຝິ່ນໃນເນື້ອທີ່ 6,600 ກວ່າເຮັກຕາ. ສຳລັບບ້ານສົບຕຸດ, ບໍລິສັດໄດ້ສ້າງປ່າແລະສວນປູກຢາງພາລາແລ້ວ, ທັງນີ້ິໄດ້ສ້າງໂອກາດແລະການປະກອບອາຊີບໃຫ້ແກ່ຊາວບ້ານຢ່າງຫຼວງຫຼາຍເປັນຕົ້ນການບົວລະບັດແນວພືດ, ບຸກເບີກດິນນາ, ການປູກຝັງ, ການຄຸ້ມຄອງແລະອື່ນໆ ໂດຍສາມາດຍົກລະດັບລາຍຮັບກໍຄືຊີວິດການເປັນຢູ່ຂອງຊາວບ້ານດີຂຶ້ນຢ່າງຫຼວງຫຼາຍ.
ທ້າວ ວີບທອງ ວີວັນທອງ ຊາວບ້ານສົບຕຸດໂດຍໃນຄອບຄົວຂອງລາວມີສະມາຊິກ 7 ຄົນນັ້ນລ້ວນແຕ່ເຮັດວຽກຢູ່ສວນຢາງພາລາສົບຕຸດແລະແຕ່ລະເດືອນຄອບຄົວຂອງລາວມີລາຍຮັບເຖິງ 12 ລ້ານກີບເຊິ່ງຖືວ່າບໍ່ໜ້ອຍສຳລັບຄອບຄົວກະສິກອນລາວ. ເມື່ອເລົ່າເຖິງການປ່ຽນແປງຂອງຄອບຄົວ, ລາວກ່າວດ້ວຍຄວາມຕື່ນເຕັ້ນວ່າ: ກ່ອນໜ້ານີ້ພວກຕົນມີຊີວິດການເປັນຢູ່ທີ່ທຸກຍາກ, ເຂົ້າຂາດແລງແກງຂາດໝໍ້ແລະເຮືອນມຸງຫຍ້າ, ແຕ່ພາຍຫຼັງບໍລິສັດໄດ້ປຸກເຮືອນໃຫ້ທັງມີໄຟຟ້າແລະນ້ຳບໍລິໂພກທີ່ສະດວກດີ, ຄອບຄົວຕົນຈຶ່ງຄ່ອຍມີຊີວິດການເປັນຢູ່ດີຂຶ້ນແລະທີ່ສຳຄັນຍັງມີເງິນຊື້ລົດຈັກຂີ່ອີກດ້ວຍ."
ທ່ານ ວຽງພອນ ເຮືອງແພງອ່ອນ ເຈົ້າເມືອງເມືອງນ້ຳທາໄດ້ໃຫ້ສຳພາດຕໍ່ນັກຂ່າວ CRI ວ່າ: "ໄປພ້ອມກັບການດຳເນີນທຸລະກິດຂອງຕົນ, ບໍລິສັດຢູນຊ້ຽງຍັງຊ່ວຍເຫຼືອພວກເຮົາກໍ່ສ້າງພື້ນຖານໂຄງລ່າງເປັນຕົ້ນປຸກເຮືອນ, ໂຮງຮຽນ, ລະບົບນ້ຳປະປາແລະໄຟຟ້າ ທັງຊ່ວຍຈັດກິດຈະກຳປາບປາມຢາເສບຕິດກໍຄືສະໜອງເງິນທຶນໃຫ້ແກ່ພວກເຮົາ. ດັ່ງນັ້ນຈຶ່ງຢືນຢັນໄດ້ວ່າ: ບໍລິສັດຢູນຊ້ຽງໄດ້ຊ່ວຍເຫຼືອພວກເຮົາຢ່າງຫຼວງຫຼາຍແລະຖືວ່າເປັນລັດວິສາຫະກິດຈີນທີ່ມີຄວາມຮັບຜິດຊອບສູງທີ່ສຸດ."