ໂດຍຕອບສະໜອງຕາມຄຳເຊີນຂອງຄະນະກຳມະການນັກຮົບເກົ່າແຫ່ງຊາດລາວ, ນັກຮົບເກົ່າ 39 ທ່ານຈາກ 10 ແຂວງຂອງຈີນທີ່ເຄີຍເຂົ້າຮ່ວມການຕໍ່ຕ້ານອາເມລິກາຢູ່ລາວນັ້ນ ໄດ້ເດີນທາງຢ້ຽມຢາມລາວຜ່ານດ່ານບໍ່ເຕັນຂອງຈີນໃນວັນທີ 14 ພະຈິກນີ້.
ນັບແຕ່ວັນທີ 15 ພະຈິກນີ້ເປັນຕົ້ນມາ, ຄະນະຜູ້ແທນນັກຮົບເກົ່າຈີນໄດ້ໄປຄຳນັບບູຊາຜູ້ເສຍສະຫຼະຢູ່ສຸສານປະຕິວັດຈີນຢູ່ເມືອງຫຼ້າແຂວງຢູນນານ ແລະສຸສານຢູ່ເມືອງນາໝໍ້ແຂວງອຸດົມໄຊ. ນອກນີ້ ຍັງໄດ້ຢ້ຽມຢາມ, ທັດສະນະສຶກສາ ແລະແລກປ່ຽນບົດຮຽນຢູ່ແຂວງຫຼວງນ້ຳທາ, ແຂວງອຸດົມໄຊ, ແຂວງຫຼວງພະບາງ ແລະແຫ່ງອື່ນໆ.
ທ່ານ ລູເຈີ່ນກຸ້ຍ ຫົວໜ້າຄະນະຜູ້ແທນນັກຮົບເກົ່າຈີນກ່າວວ່າ, ການຢ້ຽມຢາມລາວເທື່ອນີ້ໄດ້ເດີນທາງໄປໄວ້ອາໄລເພື່ອນນັກຮົບທີ່ເສຍສະຫຼະແລະຫວນຄືນອະດີດໃນໄວໜຸ່ມ ຢູ່ສະຖານທີ່ຮ່ວມສູ້ຮົບເກົ່າ ທັງນີ້ກໍເພື່ອຊຸກຍູ້ສາຍພົວພັວມິດຕະພາບແລະການຮ່ວມມືຈີນ-ລາວໃຫ້ຂະຫຍາຍຕົວຢ່າງບໍ່ຢຸດຢັ້ງດ້ວຍການກະທຳຕົວຈິງ. ຫວັງວ່າ ກິດຈະກຳເທື່ອນີ້ ຈະກາຍເປັນຂອງຂວັນໃຫ້ແກ່ວັນຄົບຮອບ 55 ປີແຫ່ງການສ້າງສາຍພົວພັນການທູດຈີນ-ລາວ, ເພີ່ມສີສັນໃຫ້ແກ່ມິດຕະພາບລະຫວ່າງປະຊາຊົນສອງຊາດ ແລະປະກອບສ່ວນຢ່າງຕັ້ງໜ້າເພື່ອການປະຕິບັດຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ".