ຕາມຂ່າວສານຊິນຮວາ: ທ່ານ ຈ່າງເຕີຈ່ຽງ ປະທານສະພາປະຊາຊົນແຫ່ງຊາດຈີນ ໄດ້ໃຫ້ກຽດຕ້ອນຮັບທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ ລາວຢູ່ຫໍສະພາປະຊາຊົນຈີນ.
ໂອກາດນີ້, ທ່ານ ຈ່າງເຕີຈ່ຽງ ກ່າວວ່າ, ຫຼາຍປີຜ່ານມາ, ສາຍພົວພັນຈີນ-ລາວ ໄດ້ຂະຫຍາຍສູ່ລວງເລິກແລະສູງຂຶ້ນຢ່າງບໍ່ຢຸດຢັ້ງ, ໂດຍສະເພາະປີນີ້ ເປັນປີຄົບຮອບ 55 ປີແຫ່ງການສ້າງສາຍພົວພັນການທູດສອງປະເທດ ແລະທ່ານປະທານ ສີຈິ້ນຜິງ ໄດ້ພົບປະກັບທ່ານປະທານ ບຸນຍັງ ວໍລະຈິດ ສອງເທື່ອ ໂດຍໄດ້ກ້າວໄປເຖິງຄວາມເປັນເອກະພາບກັນໃໝ່ແລະສຳຄັນກ່ຽວກັບການລົງເລິກການຮ່ວມມືຍຸດທະສາດຮອບດ້ານຈີນ-ລາວ. ຂະນະດຽວກັນ, ສອງປະເທດໄດ້ຕັ້ງໜ້າດຳເນີນການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ແລະການຮ່ວມມືການລົງທຶນດ້ານຄວາມສາມາດການຜະລິດ, ທັງໄດ້ປະສານສົມທົບຢ່າງໃກ້ຊິດໃນວຽກງານສາກົນກໍຄືພາກພື້ນ, ມິດຕະພາບລະຫວ່າງສອງປະເທດໄດ້ເຈືອຈານເຂົ້າໃນຈິດໃຈປະຊາຊົນສອງປະເທດຫຼາຍກວ່າເກົ່າ. ແນວໃດກໍດີ, ສະພາປະຊາຊົນແຫ່ງຊາດຈີນ ໃຫ້ຄວາມສຳຄັນຕໍ່ການຂະຫຍາຍສາຍພົວພັນມິດຕະພາບກັບສະພາແຫ່ງຊາດລາວ, ທັງຍິນດີຮ່ວມກັບລາວສືບຕໍ່ຮັກສາການພົວພັນສູ່ກັນໃຫ້ແໜ້ນແຟ້ນໃນຫຼາຍລະດັບ, ຈັດຕັ້ງປະຕິບັດຂໍ້ຕົກລົງທີ່ສຳຄັນຂອງປະມຸກລັດສອງປະເທດ, ເພີ່ມທະວີການແລກປ່ຽນບົດຮຽນໃນການບໍລິຫານປະເທດແລະສ້າງກົດໝາຍ, ຊຸກຍູ້ການຮ່ວມມືທາງເສດຖະກິດການຄ້າ, ລົງເລິກການແລກປ່ຽນດ້ານວັດທະນະທຳ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນຈີນ-ລາວໃຫ້ຫຼາຍກວ່າເກົ່າ.
ທ່ານ ທອງລຸນ ສີສຸລິດ ກ່າວວ່າ, ລາວຍິນດີພະຍາຍາມຮ່ວມກັບຈີນ, ຈັດຕັ້ງປະຕິບັດຂໍ້ຕົກລົງຂອງປະມຸກລັດສອງປະເທດ, ລົງເລິກການຮ່ວມມືທີ່ແທດເໝາະກັບຕົວຈິງ, ເພີ່ມທະວີການແລກປ່ຽນບົດຮຽນລະຫວ່າງອົງການນິຕິບັນຍັດ ແລະຊຸກຍູ້ການເສີມຂະຫຍາຍສາຍພົວພັນຂອງສອງປະເທດ.