ຕາມຂ່າວສານຈີນ: ພິທີເລີ່ມການແລກປ່ຽນຖອດຖອນບົດຮຽນລະຫວ່າງຄະນະເຕັ້ນ "ຟັງແມ່ຂອງ" ສປປ ລາວແລະສະຖາບັນລະຄອນແຂວງຊ່ານຊີ່ ສປ ຈີນ ໄດ້ຈັດຂຶ້ນຢູ່ເມືອງໄທ້ຢວນ, ເທສະບານແຂວງຊ່ານຊີ່ໃນວັນທີ 2 ທັນວານີ້ ໂດຍນັກເຕັ້ນຂອງລາວ 50 ຄົນຈະເຂົ້າຮ່ວມອົບຮົມຢູ່ຈີນເປັນເວລາ 45 ມື້ ເຊິ່ງຈະເປັນການເພີ່ມສີສັນໃໝ່ໃຫ້ແກ່ການທ່ອງທ່ຽວວັດທະນະທຳຂອງແຂວງດັ່ງກ່າວ.
ການຮ່ວມມືເທື່ອນີ້ ຈັດຂຶ້ນໂດຍຕາມຄຳຮ້ອງຂໍຂອງບໍລິສັດແມ່ນ້ຳຂອງສາກົນຈີນຈຳກັດ ແລະຜ່ານຈາກການປຶກສາຫາລືລະຫວ່າງສະຖາບັນອາຊີບລະຄອນແຂວງຊ່ານຊີ່ກັບບໍລິສັດດັ່ງກ່າວ ຈຶ່ງຕົກລົງອົບຮົມນັກເຕັ້ນຂອງລາວ 50 ຄົນທີ່ບໍລິສັດດັ່ງກ່າວຄັດເລືອກນັ້ນຢູ່ສະຖາບັນດັ່ງກ່າວນັບແຕ່ວັນທີ 1 ທັນວາ 2016 ຮອດວັນທີ 15 ມັງກອນປີ 2017.
ການອົບຮົມເທື່ອນີ້ ໄດ້ຮັບການສະໜັບສະໜູນແລະຊ່ວຍເຫຼືອຢ່າງແຂງແຮງຈາກສະຖານທູດຈີນປະຈຳລາວ, ສູນວັດທະນະທຳຈີນຂອງກະຊວງວັດທະນະທຳຈີນປະຈຳລາວ, ກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວລາວ, ພະແນກວັດທະນະທຳແຂວງຊ່ານຊີ່ ແລະພະແນກສຶກສາທິການແຂວງຊ່ານຊີ່.