ຫຼັງເຂົ້າຮ່ວມກອງປະຊຸມລັດຖະມົນຕີການຕ່າງປະເທດຄັ້ງທີ 2 ຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຢູ່ຊຽມລຽບປະເທດກຳປູເຈຍໃນວັນທີ 23 ທັນວານີ້, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ຢືນຢັນຕໍ່ສື່ມວນຊົນຈີນແລະຕ່າງປະເທດວ່າ: ກອງປະຊຸມລັດຖະມົນຕີການຕ່າງປະເທດຄັ້ງນີ້ໄດ້ກຳນົດທິດທາງການພັດທະນາຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ຈະແຈ້ງຕື່ມອີກ. ຈີນຍິນດີຮ່ວມກັບ 5 ປະເທດອື່ນຍຶດໝັ້ນຫົວຂໍ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄື "ດື່ມນ້ຳສາຍດຽວ,ຮ່ວມຊະຕາກຳຢ່າງແໜ້ນແຟ້ນ" ແລະເສີມຂະຫຍາຍທ່າແຮງພິເສດຂອງ 6 ປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງທີ່ເປັນເພື່ອນບ້ານໃກ້ຄຽງ,ມີວັດທະນະທຳຄ້າຍຄືກັນ ແລະຈຸນເຈືອກັນທາງດ້ານເສດຖະກິດ, ຄ່ອຍໆສ້າງວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງທີ່ສະເໝີພາບກັນ, ຊ່ວຍເຫຼືອກັນດ້ວຍຄວາມຈິງໃຈແລະສະໜິດກັນປານຄົນໃນຄອບຄົວດຽວ ແລະປະຕິບັດຕາມຫຼັກການ "ປຶກສາຫາລືຮ່ວມ,ສ້າງສາຮ່ວມແລະແບ່ງປັນຜົນປະໂຫຍດຮ່ວມ" ເພື່ອສ້າງແລວທາງຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະມຸ້ງໜ້າໄປສູ່ເປົ້າໝາຍສ້າງຕັ້ງປະຊາຄົມຮ່ວມຊະຕາກຳແມ່ນ້ຳລ້ານຊ້າງ-ແມ່ນ້ຳຂອງ.
ທ່ານຫວາງຢີ້ກ່າວເນັ້ນວ່າ: ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງບໍ່ພຽງແຕ່ຈະສ້າງຄວາມຜາສຸກໃຫ້ແກ່ອະນຸພາກພື້ນເທົ່ານັ້ນ, ຍັງຈະມີຜົນດີຕໍ່ການສ້າງກຳລັງແຮງໃໝ່ເພື່ອຊຸກຍູ້ການຮ່ວມມືຈີນ-ອາຊຽນ, ເລັ່ງກໍ່ສ້າງປະຊາຄົມອາຊຽນ, ຂະບວນການເຊື່ອມໂຍງເຂົ້າເປັນອັນໜຶ່ງອັນດຽວກັນຂອງພາກພື້ນ, ຮ່ວມກັນກໍ່ສ້າງ "ໜຶ່ງແລວທາງໜຶ່ງເສັ້ນທາງ"ໃຫ້ໄດ້ຮັບປະສິດທິຜົນໂດຍໄວ ແລະປະກອບສ່ວນຂອງພາກພື້ນຕົນເຂົ້າໃນການຈັດຕັ້ງປະຕິບັດວາລະການພັດທະນາແບບຍືນຍົງປີ 2030. ແນວໃດກໍດີ, ເຊື່ອໝັ້ນວ່າ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຈະໄດ້ຮັບຄວາມຊົມເຊີຍແລະການສະໜັບສະໜູນຈາກປະຊາຄົມໂລກໂດຍສະເພາະບັນດາປະເທດໃນພາກພື້ນແຫ່ງນີ້ຢ່າງແນ່ນອນ.