ພິທີເຊັນສັນຍາຮ່ວມສ້າງຕັ້ງສູນຄົ້ນຄວ້າທົດລອງການລ້ຽງແລະຂະຫຍາຍຜະລິດຕະພັນສັດນ້ຳ ລະຫວ່າງກົມຜະລິດກະສິກຳ ກົມໃຫຍ່ພະລາທິການ ກະຊວງປ້ອງກັນປະເທດລາວ ບໍລິສັດຜະລິດຕະພັນທາງນ້ຳຮວາຕ້າລາວຈຳກັດ ໄດ້ຈັດຂຶ້ນຢູ່ນະຄອນຫຼວງວຽງຈັນໃນວັນທີ 23 ທັນວານີ້ ໂດຍສອງຝ່າຍຈະຮ່ວມມືໃນການລ້ຽງແລະຂະຫຍາຍຜະລິດຕະພັນສັດນ້ຳ ພ້ອມດ້ວຍການປຸງແຕ່ງ ແລະ ການສົ່ງອອກ ເປັນຕົ້ນ.
ທ່ານວົງສັກ ພັນທະວົງ ຮອງຫົວໜ້າກົມໃຫຍ່ພະລາທິການ ກະຊວງປ້ອງກັນປະເທດລາວ ກ່າວວ່າ: ສູນຄົ້ນຄວ້າທົດລອງການລ້ຽງແລະຂະຫຍາຍຜະລິດຕະພັນສັດນ້ຳແຫ່ງນີ້ແມ່ນການຮ່ວມມືລະຫວ່າງລາວ-ຈີນເປັນແຫ່ງທຳອິດ ເຊິ່ງມີຄວາມໝາຍສຳຄັນຕໍ່ການຫັນປ່ຽນຮູບແບບ ແລະ ຍົກລະດັບອຸດສາຫະກຳການລ້ຽງແລະຂະຫຍາຍຜະລິດຕະພັນສັດນ້ຳຂອງລາວ. ຫວັງວ່າບໍລິສັດຜະລິດຕະພັນທາງນ້ຳຮວາຕ້າລາວຈຳກັດ ຈະສາມາດນຳເຕັກນິກທັນສະໄໝ ແລະ ບົດຮຽນທີ່ກ້າວໜ້າຈາກຈີນ ໂດຍສະເພາະຜົນງານການຄົ້ນຄວ້າວິທະຍາສາດດ້ານການຕັດຕໍ່ພັນທຸກຳ ເພື່ອຊຸກຍູ້ອຸດສາຫະກຳຜະລິດຕະພັນທາງນ້ຳຂອງລາວໃຫ້ພັດທະນາຢ່າງຕໍ່ເນື່ອງ ແລະສ້າງຄວາມຜາສຸກໃຫ້ແກ່ປະຊາຊົນລາວບັນດາເຜົ່າ ແລະຊຸກຍູ້ຂະບວນການຫັນເປັນທັນສະໄໝຂອງກະສິກຳລາວໃຫ້ເລັ່ງລັດໄວຂຶ້ນ.