ຕາມຂ່າວCRI: ໃນພິທີຖະແຫຼງຂ່າວທີ່ຈັດຂຶ້ນໃນວັນທີ 26 ທັນວານີ້, ທ່ານນາງ ຮວ້າຊຸ່ນຢີງ ໂຄສົກກະຊວງການຕ່າງປະເທດຈີນກ່າວວ່າ: ຈີນແລະອາເມລິກາໄດ້ແບກຫາບໜ້າທີ່ທີ່ສຳຄັນແລະພິເສດໃນການປົກປັກຮັກສາສັນຕິພາບ,ສະຖຽນລະພາບ ແລະຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງໂລກແລະດ້ານອື່ນໆ ທັງມີຜົນປະໂຫຍດຮ່ວມຢ່າງກວ້າງຂວາງ. ຈາກນີ້, ການຮ່ວມມືຈຶ່ງແມ່ນທາງເລືອກທີ່ຖືກຕ້ອງທາງດຽວລະຫວ່າງຈີນ-ອາເມລິກາ.
ທ່ານ ສບິກເນຍ ກາຈີເມຍສ໌ ບຣິສຈິນສກີ ອະດີດຜູ້ຊ່ວຍວຽກງານຄວາມໝັ້ນຄົງແຫ່ງຊາດຂອງປະທານາທິບໍດີອາເມລິກາກ່າວຫວ່າງມໍ່ໆນີ້ວ່າ: ການຕໍ່ຕ້ານຈີນບໍ່ສອດຄ່ອງກັບຜົນປະໂຫຍດຂອງອາເມລິກາ,ເຊິ່ງມີພຽງແຕ່ຮັດແໜ້ນການຮ່ວມມືກັບຈີນເທົ່ານັ້ນຈຶ່ງຈະສອດຄ່ອງກັບຜົນປະໂຫຍດຂອງອາເມລິກາຫຼາຍກວ່າ. ອາເມລິກາແລະຈີນລ້ວນແຕ່ບໍ່ສາມາດນຳພາໂລກຜູ້ດຽວ, ມີແຕ່ການຮ່ວມມືລະຫວ່າງສອງປະເທດຈຶ່ງຈະສາມາດເຮັດໃຫ້ອາເມລິກາມີອິດທິກຳລັງຫຼາຍຂຶ້ນຢູ່ໃນໂລກ. ຕໍ່ເລື່ອງນີ້, ທ່ານນາງ ຮວ້າຊຸ່ນຢີງ ກ່າວວ່າ: ຈີນແລະອາເມລິກາຄວນປະຕິບັດຫຼັກການບໍ່ປະທະກັນແລະບໍ່ຕໍ່ຕ້ານກັນ, ເຄົາລົບເຊິ່ງກັນແລະກັນ, ຮ່ວມມືແບບຕ່າງຝ່າຍຕ່າງມີຜົນປະໂຫຍດ, ເພີ່ມຄວາມໄວ້ເນື້ອເຊື່ອໃຈກັນ,ສຸມໃສ່ການຮ່ວມມື,ແກ້ໄຂຄວາມຂັດແຍ້ງກັນຢ່າງເໝາະສົມ,ຊຸກຍູ້ສາຍພົວພັນລະຫວ່າງສອງປະເທດໃຫ້ໄດ້ຮັບການພັດທະນາຫຼາຍກວ່າເກົ່າ ເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງປະເທດກໍຄືຂອງໂລກ.
 |
