ຫວ່າງກ່ອນນີ້ບໍ່ດົນ,ທ່ານສີຈິ້ນຜີງ,ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ,ປະທານຄະນະກຳມະການການທະຫານສູງກາງຈີນໄດ້ໃຫ້ຄຳຊີ້ແຈງສຳຄັນຕໍ່ການສ້າງເຂດທົດລອງການຄ້າເສລີຊຽງໄຮ ໂດຍກ່າວວ່າ, ການສ້າງເຂດທົດລອງດັ່ງກ່າວເປັນມາດຕະການຍຸດທະສາດທີ່ສູນກາງພັກແລະຄະນະລັດຖະບານວາງອອກພາຍໃຕ້ສະພາບການໃໝ່ເພື່ອລົງເລິກການປະຕິຮູບແລະເປີດກວ້າງການເປີດປະຕູສູ່ພາຍນອກຢ່າງຮອບດ້ານ. ຫວັງວ່າໂດຍຢູ່ບົນພື້ນຖານແຫ່ງການສະຫຼຸບແລະປະເມີນຜົນນັ້ນ, ຍຶດໝັ້ນການນຳພາຂອງ5ທັດສະນະການພັດທະນາ, ກຳແໜ້ນຖານະພື້ນຖານ,ເພີ່ມທະວີສະຕິແບກຫາບພາລະໜ້າທີ່,ສືບຕໍ່ປົດປ່ອຍແນວຄິດ,ບຸກທະລຸຢ່າງກ້າຫານ,ເສີມຂະຫຍາຍບົດບາດແບບຢ່າງທີ່ດີ,ໂດຍທຽບກັບມາດຕະຖານສູງສຸດເພື່ອຊອກຄົ້ນຂໍ້ບົກຜ່ອງຂອງຕົນ,ຄົ້ນຄວ້າເປົ້າໝາຍແລະໜ້າທີ່ສຳຄັນໃນໄລຍະຕໍ່ໜ້າ,ທົດລອງແລະບຸກເບີກຢ່າງກ້າຫານແລະປະຕິຮູບຢ່າງເປັນເຈົ້າຕົນເອງ, ພະຍາຍາມໃຫ້ໄດ້ຮັບໝາກຜົນປະດິດສ້າງໃໝ່ທີ່ສາມາດເຜີຍແຜ່ຢ່າງກວ້າງຂວາງ,ສ່ອງແສງເຖິງບົດບາດເຂດທົດລອງໃນການລົງເລິກການປະຕິຮູບແລະເປີດກວ້າງການເປີດປະຕູສູ່ພາຍນອກຢ່າງຮອບດ້ານຕື່ມອີກ.
ນັບແຕ່ເຂດທົດລອງການຄ້າເສລີຊຽງໄຮໄດ້ສ້າງຕັ້ງຂຶ້ນ3ປີມານີ້,ໄດ້ຖືການສ້າງເຂດການຄ້າເສລີໃນລະດັບສູງສຸດເປັນເປົ້າໝາຍ,ຖືການປະດິດສ້າງລະບຽບການໃໝ່ເປັນໜ້າທີ່ແກນກາງ, ຖືການປ້ອງກັນຄວາມສ່ຽງເປັນເສັ້ນເຕືອນໄພທີ່ສຳຄັນ,ແລະໄດ້ຮັບໝາກຜົນທີ່ສຳຄັນຫຼາຍຢ່າງ, ເຊັ່ນ,ລະບົບລະບຽບການການຄ້າແລະການລົງທຶນທີ່ເຊື່ອມໂຍງກັບລະບຽບການສາກົນ,ລົງເລິກການເປີດປະຕູດ້ານການທະນາຄານ, ເລັ່ງລັດຫັນປ່ຽນບົດບາດຂອງອົງການປົກຄອງ,ສ້າງລະບຽບການໃໝ່ດ້ານເສດຖະກິດແບບເປີດກວ້າງ,ແລະອື່ນໆ, ເຊິ່ງໄດ້ກະຕຸກພະລັງຊີວິດຊີວາດ້ານການປະຕິສ້າງໃໝ່ຂອງຕະຫຼາດ,ໃນເຂດທົດລອງມີວິສາຫະກິດທີ່ລົງທະບຽນໃໝ່4ໝື່ນແຫ່ງ, ຫຼາຍກວ່າຍອດຈຳນວນຂອງ20ກວ່າປີກ່ອນການເປີດປ້າຍເຂດທົດລອງ.
 |
