ວັນທີ 4 ມັງກອນນີ້, ທ່ານ ເກິງສວງ ໂຄສົກກະຊວງການຕ່າງປະເທດຈີນກ່າວໃນພິທີຖະແຫຼງຂ່າວວ່າ: ປີ 2017, ຟີລິບປິນຈະເລີ່ມປະຕິບັດໜ້າທີ່ເປັນປະເທດປະທານໝູນວຽນອາຊຽນ ເຊິ່ງຈີນກໍຈະສະໜັບສະໜູນການເປັນປະເທດປະທານໝູນວຽນຢ່າງດີ ຫວັງຊຸກຍູ້ການພົວພັນລະຫວ່າງຈີນ-ອາຊຽນໃຫ້ກ້າວຂຶ້ນສູ່ລະດັບໃໝ່.
ທ່ານ ເກິງສວງ ກ່າວວ່າ: ລັດຖະບານຈີນໄດ້ຖືອາຊຽນເປັນບຸລິມະສິດທາງການທູດແລະໃນໂອກາດທີ່ ປີນີ້ແມ່ນປີແຫ່ງການຮ່ວມມືດ້ານການທ່ອງທ່ຽວລະຫວ່າງຈີນ-ອາຊຽນ ແລະ ປີແຫ່ງການສ້າງຕັ້ງອາຊຽນຄົບຮອບ 50 ປີ, ການພົວພັນລະຫວ່າງສອງຝ່າຍໄດ້ພົບໂອກາດໃນການຍົກລະດັບແລະຄຸນນະພາບໂດຍຈີນຍິນດີຮ່ວມກັບອາຊຽນ ເພີ່ມທະວີການແລກປ່ຽນດ້ານນະໂຍບາຍ,ການເຊື່ອມຕໍ່ທາງຍຸດທະສາດ ແລະ ການຮ່ວມມືທີ່ແທ້ຈິງຕື່ມອີກ, ລົງເລິກການຮ່ວມມືຢ່າງຮອບດ້ານທັງດ້ານເສດຖະກິດ-ການຄ້າ,ການເຊື່ອມຈອດກັນ ແລະ ຄວາມສາມາດດ້ານການຜະລິດເປັນຕົ້ນ, ຈັດຕັ້ງປະຕິບັດແຜນການເຄື່ອນໄຫວ 5 ປີ ສະບັບທີ 3 ໃຫ້ດີ, ຊຸກຍູ້ການຍົກລະດັບເຂດການຄ້າເສລີຈີນ-ອາຊຽນໃຫ້ໄດ້ຮັບການຈັດຕັ້ງປະຕິບັດແລະໄດ້ຮັບໝາກຜົນດີ. ຂະນະດຽວກັນ, ກໍຈັດຕັ້ງປີແຫ່ງການຮ່ວມມືດ້ານການທ່ອງທ່ຽວໃຫ້ດີ,ສ້າງເສົາຄ້ຳໃໝ່ແຫ່ງການຮ່ວມມືດ້ານວັດທະນະທຳ ເພື່ອເພີ່ມພະລັງແຮງໃໝ່ໃນການຮ່ວມມືລະຫວ່າງສອງຝ່າຍ.