ກຸ່ມບໍລິສັດລົງທຶນພະລັງງານໄຟຟ້າແຫ່ງຊາດຈີນຖະແຫຼງໃນວັນທີ 5 ມັງກອນນີ້ວ່າ: ບໍລິສັດໂຄງການລະບົບອຸປະກອນອັດຕະໂນມັດໄຟຟ້ານິວເຄລຍແຫ່ງຊາດຈຳກັດທີ່ຂຶ້ນກັບກຸ່ມຕົນແລະບໍລິສັດLockheed Martin ອາເມລິກາໄດ້ຮ່ວມມືພັດທະນາລະບົບຄວບຄຸມອຸປະກອນດີຈີຕອນຮັກສາຄວາມປອດໄພ (ເຄື່ອງໝາຍສິນຄ້າລົງທະບຽນຄື UnPAC) ເຊິ່ງໄດ້ຜ່ານການອະນຸມັດຈາກອົງການຄວາມປອດໄພໄຟຟ້ານິວເຄລຍແຫ່ງຊາດຈີນແລະຄະນະກຳມະການຄຸ້ມຄອງນິວເຄລຍອາເມລິກາ ແລະກາຍເປັນລະບົບປົກປ້ອງເຄື່ອງປະຕິກອນໂຮງໄຟຟ້ານິວເຄລຍທີ່ໄດ້ຮັບໃບອະນຸຍາດທັງຂອງຈີນແລະອາເມລິກາລະບົບທຳອິດໃນໂລກ.
ຂ່າວແຈ້ງວ່າ: ລະບົບ UnPAC ນອກຈາກໃຊ້ໃນການປົກປ້ອງຄວາມປອດໄພຂອງໝວດຈັກຜະລິດໄຟຟ້ານິວເຄລຍປະເພດເຄື່ອງປະຕິກອນ ແລະອຸປະກອນແມ່ແຮງນິວເຄລຍພົນລະເຮືອນທຸກປະເພດແລ້ວ, ຍັງສາມາດໃຊ້ເຂົ້າໃນຂົງເຂດຄວບຄຸມອຸປະກອນອຸດສາຫະກຳທັນສະໄໝທີ່ໜ້າເຊື່ອຖືແລະມີຄວາມປອດໄພສູງ. ຂະນະທີ່ກຸ່ມບໍລິສັດລົງທຶນພະລັງງານໄຟຟ້າແຫ່ງຊາດຈີນຢືນຢັນວ່າ ລະບົບ UnPAC ລະບົບທຳອິດຈະໃຊ້ເຂົ້າໃນໂຄງການໂຮງໄຟຟ້າໂຕແບບCAP1400ຢົງເສິງແຂວງຊ່ານຕຸ່ງ.